Goa News: राष्ट्रपिता महात्मा गांधींजींची विचारसरणी आणि स्वच्छतेसंदर्भात त्यांचे कार्य केवळ भाजप आणि देशाचे पंतप्रधान नरेंद्र मोदीजीच पुढे नेत असल्याचा दावा कळंगुटचे आमदार मायकल लोबो यांनी हडफडेत केला. याबाबत मुख्यमंत्री डॉ. प्रमोद सावंत यांनी महात्मा गांधी आणि राहुल गांधी यांच्यात कुठलेही रक्ताचे नाते नसल्याच्या केलेल्या विधानाचेही लोबो यांनी समर्थन केले.

हडफडे येथील स्थानिक शेतकऱ्यांना मोफत मळणी यंत्राचे वाटप केल्यानंतर ते बोलत होते. यावेळी हडफडेचे सरपंच (Sarpanch) रोशन रेडकर, उप-सरपंच गीता परब, माजी सरपंच तसेच विद्यमान पंच सदस्य राजेश मोरजकर, टिनू डिसोझा, इतर मंडळाचे सदस्य, भाजप कळंगुट मंडळाचे अध्यक्ष यशवंत कांदोळकर, सदस्य सुदेश शिरोडकर, लक्ष्मण परब, माथाइश डिसोझा आदी कार्यकर्ते उपस्थित होते.

कळंगुट (Calangute) पंचायतीचे सरपंच जोजफ सिक्वेरा यांच्याशी आपले कुठल्याच प्रकारचे मतभेद नसल्याचे सा़ंगतानाच सिक्वेरा राजकारणातील धुरंधर असल्याचे लोबो यांनी सांगितले. कालच पार पडलेल्या झेडपीच्या पोटनिवडणुकीत मतदारांनी दाखवलेल्या निरुत्साहाचे कारण, जिल्हा पंचायत सदस्यांना विकासकामांसाठी मिळणारा अपुरा निधी तसेच विकासकामांसाठी मिळणारा अपुरा निधी असल्याचे सांगितले.

झेडपींसाठी सध्या मिळणारा निधी गटार बांधकामासाठीसुद्धा पुरत नसल्याचे लोबो यांनी यावेळी सांगितले. झेडपींच्या अधिकाराखाली गावातील चिल्ड्रन्स पार्क्स, बॅडमिंटन मैदाने, जॉगर्स पार्क आदी एकाच छताखाली आणणे गरजेचे असल्याचे लोबो यांनी सांगितले.