Goa Congress: आगामी लोकसभा निवडणुकीच्या पार्श्‍वभूमीवर काँग्रेसने स्थानिक पातळीवर मोर्चेबांधणीला सुरवात केली आहे. गोवा प्रभारी मणिक्कम टागोर यांनी शनिवारी पक्षीय कार्यालयात ठाण मांडून पक्षाच्या मतदारसंघनियाह पदाधिकाऱ्यांशी संवाद साधला आणि पक्षाच्या कामाचा आढावा घेतला.

लोकसभेच्या गोव्यातील दोन्ही जागा जिंकण्यासाठी काँग्रेस पक्षाने हालचाली सुरू केलेल्या आहेत. गट समित्यांचे प्रमुख आणि जिल्हाध्यक्षांची मते जाणून घेणे, त्यांच्या समस्या जाणून घेण्याचे काम पक्षीय पातळीवर सर्वत्र सुरू झालेले आहे.

भाजपविरोधात सर्वपक्षीय विरोधी पक्षांची आघाडी तयार करण्याच्या हालचालींना जोर आला आहे. त्यात काँग्रेसची महत्त्वाची भूमिका असली, तरी या पक्षाने एक पाऊल मागे घेत इतरांनाही बरोबर घेऊन जाण्यासाठी पाऊल टाकले आहे.

त्यामुळे इतर विरोधी पक्षांची लोकसभेपूर्वी आघाडी झालीच, तर गोव्यातही इतर पक्षांना काँग्रेसबरोबर जावे लागणार आहे. त्यात आम आदमी पक्ष आणि तृणमूल काँग्रेसचा समावेश असेल. त्यादृष्टीने सर्वांची मते जाणून घेण्याबरोबच पक्ष बांधणी कशा पद्धतीने सुरू आहे याचा सर्व आढावा टागोर यांनी घेतला आहे.