चावडी: गोव्यातून कर्नाटकात बेकायदा मद्य तस्करी उघड झाली असून सुमारे ३०० मद्याच्‍या पेट्या काणकोण अबकारी विभागाच्या पथकाने पोळे तपासणी नाक्यावर जप्त केल्या.जप्त केलेल्या मद्याची किंमत तब्बल १८ लाख ७२ हजार रुपये असून बटाट्यांच्या पिशव्यांखाली मद्याच्या पेट्या लपवलेल्या होत्या. हा ट्रक कर्नाटकच्या दिशेने नेण्यात येत होता.

अबकारी विभागाने मद्यासह ट्रक ताब्यात घेतला, मात्र या ट्रकचे चालक आणि मदतनीस पसार झाले. पोळे चेकनाक्यावर सकाळी साडेआठच्या सुमारास अबकारी कर्मचाऱ्यांनी संशयावरून एका ट्रकला अडविले. ट्रकमध्ये बटाटे असून ते कर्नाटकात नेण्यात येत असल्याचे चालक व हेल्परने सांगितले. मात्र, कर्नाटकातून मोठ्या प्रमाणात बटाटे गोव्यात येतात. त्याउलट गोव्यातून कर्नाटकात बटाटे नेण्याचे प्रमाण अत्यल्प असल्याने कर्मचाऱ्यांना संशय आला.

त्यामुळे पोलिसांनी ही कारवाई केली, त्या हा मद्यसाठा जप्त करण्यात आला. ही कारवाई काणकोणचे अबकारी निरीक्षक रोहित देसाई, उपनिरीक्षक प्रदीप खोलकर आणि त्यांच्या सहकाऱ्यांनी केली. मंत्री रमेश तवडकर यांनी एका कार्यक्रमात पोळे चेकनाक्यावरील कारभाराबाबत नाराजी व्यक्त केली होती. त्यानंतर काही दिवसातच अबकारी विभागाने मोठ्या प्रमाणात दारू पकडल्याने पोळे चेकनाक्यावरील कारभार पुन्हा चर्चेत आला आहे.

सीसीटीव्ही नादुरुस्त?

चेकनाक्यावर सीसीटीव्ही कॅमेरे असतानाही दोघे पळून जाण्यात यशस्वी कसे झाले? त्यावेळी सीसीटीव्ही यंत्रणा कार्यरत होती का? याची चौकशी करावी, अशी ग्रामस्थांची मागणी आहे. परिसरात माकडांचा वावर असून त्यांच्या उपद्रवामुळे सीसीटीव्ही कॅमेऱ्यांची मोडतोड होत असल्याचे कर्मचाऱ्यांकडून सांगण्यात आले. त्यामुळे तपासणी यंत्रणेच्य कार्यक्षमतेवर पुन्हा एकदा प्रश्नचिन्ह निर्माण झाले आहे.