वाळपई: होंडा - सत्तरी येथे विजेचा धक्का बसून मरण पावलेले लाईनमन चंद्रू ऊर्फ सूर्या गावकर (वय ३५, रा. मोर्ले-घोडेमळ) यांच्या कुटुंबीयांची रविवारी (२५ मे) संध्याकाळी आमदार डॉ. दिव्या राणे यांनी भेट घेऊन त्यांचे सांत्वन केले. तसेच त्यांनी सरकारतर्फे देण्यात आलेला ७ लाखांच्या मदतीचा धनादेश त्यांच्या कुटुंबीयांकडे सुपूर्द केला.

यावेळी डॉ. दिव्या राणे म्हणाल्या, की चंद्रू गावकर हे मेहनती व कष्टाळू होते. त्यांच्या निधनामुळे त्यांच्या कुटुंबीयांवर आलेले संकट व दुःख आम्ही समजू शकतो. त्यांच्या दुखात आम्ही सहभागी आहोत आणि त्यांच्या कुटुंबीयांना कोणतीही कमरता भासू देणार नाही.

आज सरकारतर्फे चंद्रू गावकर यांच्या कुटुंबीयांना ७ लाखांची मदत देण्यात आली असून दोन दिवसांत ही रक्कम त्यांच्या खात्यात जमा होणार आहे. यापूर्वी आरोग्यमंत्री व आपण ५ लाखांची मदत त्यांना दिलेली आहे. त्याचबरोबर त्यांच्या मुलांचा शिक्षणाचा खर्च आम्ही उचलणार आहोत. चंद्रू यांचा मृत्यू कर्तव्य बजावताना ड्युटीवर असताना झाला आहे.

त्यामुळे त्यांची नोकरी त्यांच्या पत्नीला देण्याचा प्रयत्न करणार असून सरकारकडे तसेच मुख्यमंत्र्यांकडे बोलून पुढील सोपस्कार करण्याचे आमचे प्रयत्न आहेत, असेही डॉ. राणे यांनी सांगितले.

...तर युवक नोकरीस घाबरतील

दोन वर्षांपूर्वी ठाणे - सत्तरी येथील संजय गावकर यांचासुध्दा असाच विजेचा धक्का बसून मृत्यू झाला होता. त्यांच्या पत्नीला त्यानंतर आपण पुढाकार घेऊन त्यांची नोकरी दिली. अशाप्रकारे सत्तरीतील तरुण अपघातात मरण पावत असतील, तर यापुढे वीज खात्यात नोकरी करण्यास युवा वर्ग घाबरतील.