पणजी, गोव्यातील क्रीडा खेळाडूंना प्रोत्साहन देण्यासाठी साधनसुविधा उपलब्ध होत नाहीत. त्यामुळे राष्ट्रीय धोरणाच्या धर्तीवर राज्यातही गोवा राज्य युवा धोरण अधिसूचित करण्यात यावे.

प्रत्येक मतदारसंघासाठी वर्षाकाठी क्रीडा साधनसुविधा खरेदीसाठी देण्यात येणारा २.५ लाखांचा निधी खूपच कमी आहे, त्यात वाढ करण्यात यावी. राष्ट्रीय स्पर्धेत पदके मिळवणाऱ्यांसाठी सरकारी नोकऱ्या दिल्यास अनेकजण क्रीडा क्षेत्राकडे वळतील, असे मत आमदार व्हेन्झी व्हिएगस यांनी क्रीडा खात्याच्या मागण्यांवरील चर्चेवेळी आज विधानसभेत व्यक्त केले.

कला अकादमीच्या नूतनीकरणार यापूर्वी बरीच चर्चा झाली आहे व जो काही प्रकार झालेला आहे तो सर्वश्रुत आहे. त्यामुळे त्यावर आणखी काही बोलण्याची गरज भासत नाही. या कला अकादमीला पूर्वीचे वैभव व दर्जा पुन्हा आणावा.

कला व संस्कृती खात्याकडून प्रत्येक आमदारांना देण्यात येणारा निधी समान असावा. त्यामध्ये भेदभाव करू नये. कला गौरव पुरस्कार देण्यामध्ये भेदभाव केला जातो. या पुरस्कारासाठी निवड प्रक्रियेत पारदर्शकता नाही ती आणावी.

कला सन्मान योजना सध्या बंद आहे ती पुन्हा सुरू करावी. ग्रामीण विकास यंत्रणा खात्यामध्ये कर्मचाऱ्यांची उणीव आहे ती पूर्ण करावी, असे मत व्हिएगस यांनी मांडले.

चांगले प्रशिक्षक निवडावेत

राज्यात गोवा राज्य युवा धोरण नसल्याने युवा पिढीला क्रीडा क्षेत्रात प्रोत्साहन देण्यासाठी सरकारकडे कोणतीच योजना नाही. साधनसुविधांअभावी क्रीडा क्षेत्राकडे युवा पिढी वळत नाही. सरकारने क्रीडा क्षेत्रात युवकांना संधी उपलब्ध करून द्यायला हव्यात.

त्यासंदर्भातची जागृती व्हायला हवी. पुढील राष्ट्रीय स्पर्धांसाठी गोव्याने आतापासूनच खेळाडूंना प्रशिक्षण देण्यासाठी चांगल्या प्रशिक्षकांची नियुक्ती करावी. त्यामुळे युवा पिढी खेळाकडे वळू शकते, असे मत व्हिएगस यांनी मांडले.