Konkan Railway: कोकण रेल्वेच्या मडगाव स्थानकात प्रवेश करणाऱ्या सर्व प्रकारच्या वाहनांसाठी कोकण रेल्वेने शुल्क घेण्यास सुरुवात केली असल्याची माहिती प्राप्त झाली आहे. वाहन 10 मिनिटे थांबल्यास शुल्क आकारले जाईल. स्थानकावर पार्किंग रेटचा बोर्डवर लावला असून त्यावर कुठल्या वाहनासाठी किती शुल्क आकारणी केली जाईल याची माहिती देण्यात आली आहे.

मागील दोन दिवसांपासून हा बोर्ड रेल्वे स्टेशनच्या बाहेर लावला असून उमिया एंटरप्राइजेसने हे कॉन्ट्रॅक्ट घेतले असल्याचे समजतेय. मात्र प्रवाश्यांना देण्यात येणाऱ्या पावतीमध्ये मात्र SNN एंटरप्राइज असे नाव असल्याने संभ्रम निर्माण झाला आहे.

कोकण रेल्वेचे उप प्रादेशिक व्यवस्थापक बबन घाटगे यांच्याशी संपर्क साधला असता ते म्हणाले की आम्ही ठेकेदाराला हे काम तात्काळ थांबवण्यास सांगितले आहे.

रेल्वे प्रशासनाकडून अद्याप ही सुविधा सुरू केलेली नाही. ठेकेदाराला सांगूनही कालपासूनच ठेकेदाराकडून प्रवेशद्वारावर बोर्ड लावून वाहनांकडून पैसे आकारले जात आहेत.

या बोर्डवर शुल्क आकारण्यात येणाऱ्या वाहनाचे प्रकार देण्यात आले असून यामध्ये पर्यटक बस, पर्यटक मिनीबस, चारचाकी वाहन, तीनचाकी वाहन, दुचाकी आणि सायकलला सुद्धा शुल्क आकारण्यात येणार आहे. 2 रुपयांपासून 50 रुपयांपर्यंतचे दर दाखवण्यात आले आहेत.