पणजी: गुंतवणूक प्रोत्साहन मंडळाच्या बैठकीत एकूण ९ प्रकल्पांना मंजुरी देण्यात आली. त्यामध्ये सुमारे ७३३ कोटी रुपयांची गुंतवणूक होणार असून २ हजार ३१९ रोजगार संधी निर्माण होणार आहेत. मंजूर प्रकल्पांमध्ये औषध निर्मिती, गोदाम सुविधा, यंत्रसामग्री उत्पादन आणि पेय निर्मिती यांचा समावेश आहे.

मंडळाची ३८ वी बैठक मुख्यमंत्री डॉ. प्रमोद सावंत (Chief Minister Dr. Pramod Sawant) यांच्या अध्यक्षतेखाली झाली. यावेळी उद्योगमंत्री माविन गुदिन्हो उपस्थित होते. मुख्यमंत्री आणि उद्योगमंत्री यांनी या प्रकल्पांमधून जास्तीत जास्त रोजगार स्थानिकांना मिळावेत, यावर भर दिला. मंडळावरील उद्योग संघटनांच्या प्रतिनिधींना गोव्यातील (Goa) युवकांची कौशल्यवृद्धी करण्यासाठी सरकारी यंत्रणांशी समन्वय साधण्याचे निर्देश त्यांनी दिले.

बैठकीतील महत्त्वपूर्ण निर्णय

राज्य सरकारने लॉजिस्टिक्स क्षेत्राला औद्योगिक दर्जा दिला आहे. त्याअंतर्गत एक्सप्रेस मशीन्स ॲण्ड स्काफोल्डींग या कंपनीला राज्यात नवीन मोठी गोदाम सुविधा निर्माण करण्यास आज गुंतवणूक प्रोत्साहन मंडळाच्या बैठकीत मंजुरी दिली.

मंजूर प्रकल्पांमध्ये प्रॉक्टर ॲण्ड गॅम्बल कंपनीच्या जिलेट डायव्हरसिफाईड या उपकंपनीने मल्टीव्हिटॅमिन टॅब्लेट आणि फूड-ग्रेड सॉफ्टजेल कॅप्सूल्स उत्पादनासाठीचा प्रस्तावित प्रकल्‍प, झायडस लाईफसायन्सचा रेप्स्यूल्स उत्पादनाचा प्रकल्‍प आदींचा समावेश आहे.

केपे येथील इको-टुरिझम प्रकल्पाचा विस्तार करण्यास मान्यता देण्यात आली असून, तो आता ‘इंडियन हॉटेल्स कॉर्पोरेशन’ ब्रॅण्डअंतर्गत कार्यरत असेल.