Goa Weather Forecast

भारतीय हवामान खात्याच्या गोवा वेधशाळेने एप्रिलच्या पहिल्या आठवड्यात राज्यात पावसाची शक्यता व्यक्त केली आहे. सहा एप्रिल (शनिवारी) गोव्यातील विविध ठिकाणी हलक्या स्वरूपाच्या पावसाची शक्यता गोवा वेधशाळेने वर्तवली आहे.

राज्यातील कडक ऊन आणि असह्य गर्मी यामुळे त्रस्त नागरिकांना यामुळे काहीसा दिलासा मिळण्याची शक्यता आहे. दरम्यान, हा पाऊस पूर्व मान्सूनच्या सरी असल्याचे सांगितले जात आहे.

हवामान खात्याच्या अंदाजानुसार, राज्यात 31 मार्च ते 05 एप्रिल या काळात हवामान कोरडे राहणार असून, येत्या तीन दिवसात तापमानात मोठा बदल होण्याची शक्यता नाही.

गेल्या महिन्याच्या शेवटच्या दिवशी राज्यातील मुरगाव आणि पणजीत सर्वाधिक 33.4 अंश सेल्सियस तापमान नोंदविण्यात आले. तर, 25.9 अंश सेल्सियस सर्वात कमी तापमानाची नोंद करण्यात आली.

मान्सूनपूर्व हंगाम जसजसा जवळ येत आहे, तसतसा गोव्यात पडणाऱ्या पावसाबाबत अंदाज व्यक्त केले जात आहेत. साधारणपणे राज्यात मे महिन्यात मान्सूनपूर्व सरी कोसळतात. दरम्यान, येत्या सहा एप्रिल रोजी राज्यातील विविध भागात हलक्या स्वरुपाचा होण्याची शक्यता व्यक्त केली जात आहे.

आगामी मान्सूनचा विशेषतः कोकण आणि गोवा प्रदेशांवर परिणाम होईल, असा अंदाज व्यक्त केला जात आहे. गोव्यात मान्सूनपूर्व पावसाचे आगमन अद्याप लांबणीवर असले तरी, केरळसारख्या राज्यांच्या तुलनेत राज्यात तुलनेने थंड तापमान जाणवत असल्याचे खात्याने नमूद केले आहे.