कर्नाटकातील कमलापूर, गुलबर्गा येथे गोवा - हैद्राबाद बस आणि मालवाहू वाहनांमध्ये आज भीषण अपघात झाला आहे. अपघातानंतर बसने पेट घेतल्याने 10 जणांचा जळून मृत्यू झाल्याची धक्कादायक बातमी समोर आली आहे. शिवाय 16 प्रवासी गंभीर जखमी झाले आहेत. ( Goa - Hyderabad Accident)

अपघात नेमका कसा झाला?

हैदराबाद येथील अर्जुन कुमार आपल्या मुलीच्या वाढदिवसाच्या पार्टीसाठी कुटुंबियांसह गोव्यात आले होते. गोव्यात आपल्या मुलीच्या वाढदिवसाची पार्टी करून ते परतत असताना कमलापूर, गुलबर्गा येथे त्यांच्या बसचा अपघात झाला. या सेलिब्रेशनमध्ये कुटुंबीय आणि मित्रमंडळींना सहभागी करता यावं म्हणून त्यांनी खास बसही केली होती.

पोलीस अधीक्षक इशा पंत यांनी दिलेल्या माहितीतून अपघताचे नेमके कारण समोर आले आहे. गोव्याहून हैदराबादकडे निघालेली बसची कमलापूर येथे एका मालवाहू लॉरीशी जोरदार धडक बसली. दोन्ही वाहनांची टक्कर झाल्यानंतर बस काही अंतरावर गेली, उलटली आणि बसला आग लागली.

या भीषण आगीमध्ये 10 प्रवाशांचा होरपळून मृत्यू झाला आहे. शिवाय 16 प्रवासी गंभीर जखमी झाले आहेत. सर्व जखमी प्रवाशांवर रुग्णालयात उपचार सुरू आहेत. बसमध्ये एकूण 28 जण होते.