गोवा माध्यमिक आणि उच्च माध्यमिक शिक्षण मंडळाचा 12 वी परीक्षेचा निकाल 95.46 टक्के लागला असून मागील वर्षापेक्षा तो दोन टक्क्यांनी जास्त आहे. विशेष म्हणजे, यंदाही निकालात मुलींनी बाजी मारल्याची माहिती मंडळाचे अध्यक्ष भगीरथ शेट्ये यांनी दिली.

यावेळी मंडळाचे सचिव विद्यादत्त नाईक, उपसंचालक भारत चोपडेकर, साहाय्यक संचालक शीतल कदम उपस्थित होते. पर्वरी येथील उच्च माध्यमिक शिक्षण विभागाच्या कार्यालयातील आयोजित परिषद सभागृहात आयोजित पत्रकार परिषदेमध्ये ते बोलत होते

शेट्ये म्हणाले की, यंदाचा बारावीचा निकाल 95.46 टक्के लागला आहे. गतवर्षी म्हणजेच २०२२ मध्ये बारावीचा निकाल ९२.६६ टक्के इतका लागला होता. यंदा एकूण १९ हजार ३७७ विद्यार्थ्यांनी परीक्षा दिली होती. पैकी १८ हजार ४९७ विद्यार्थी उत्तीर्ण झाले आहेत. यामध्ये मुलींचा टक्का ९५.८८ टक्के असून मुलांचा टक्का ९५.०३ टक्के इतका आहे. ४९ जणांचे निकाल विविध कारणांमुळे राखून ठेवले आहेत. एकूण ९,६६१ मुलांनी परीक्षा दिली. पैकी ९,१८१ मुले उत्तीर्ण झाली. यंदा ९,७१६ मुलींनी परीक्षा दिली होती. त्यापैकी ९,३१६ मुली उत्तीर्ण झाल्या.

निकालाची प्रत ऑनलाईन मिळणार

8 मे रोजी सकाळी नऊ वाजल्यापासून शाळेच्या लॉगीनवरून निकाल डाऊनलोड करता येईल. विद्यार्थी अधिकृत संकेतस्थळावरून निकालाची प्रत डाऊनलोड करू शकतात. मंडळाच्या www.gbshse.in तसेच http://results.gbahsegoa.net// या वेबसाईटवर हा निकाल पाहता येईल.

इयत्ता दहावीचा निकाल ‘मे’च्या मध्यावर जाहीर होईल, अशी माहिती बोर्डाचे अध्यक्ष भगीरथ शेट्ये यांनी दिली.