पणजी: मुरगाव बंदर प्राधिकरणाच्या (एमपीए) हेडलँड सडा येथील छत्रपती शिवाजी महाराजांच्या वादग्रस्त पुतळ्याबाबत पर्यायी जागा सुचवावी, असे निर्देश मुंबई उच्च न्यायालयाच्या गोवा खंडपीठाने आमदार संकल्प आमोणकर यांच्यासह स्थानिकांना दिले आहेत.

या पुतळ्याप्रकरणी न्यायालयात सुनावणी सुरू असल्याने आमदारांसह स्थानिकांनी हस्तक्षेप याचिका दाखल केली होती. यावेळी न्यायालयाने हे निर्देश दिले. या प्रकरणाची पुढील सुनावणी आता २१ जुलै रोजी होणार आहे. आज झालेल्या सुनावणीवेळी मुरगावचे आमदार संकल्प आमोणकर यांच्यासह स्थानिक रहिवाशांनी न्यायालयासमोर हस्तक्षेप याचिका दाखल करून आपली बाजू मांडली.

‘एमपीए’च्या जागेवर छत्रपती शिवाजी महाराजांचा पुतळा बेकायदेशीरपणे उभारल्याचा दावा करत ‘एमपीए’ने न्यायालयात याचिका दाखल केली होती. त्यानंतर पुतळा हटविण्याचे आदेश न्यायालयाने दिले होते. छत्रपती शिवाजी महाराजांचा हा पुतळा तेथून हटविल्यानंतर तो नेमका कुठे हलविला जाईल आणि कुठे सुरक्षित ठेवला जाईल, हा एक संवेदनशील मुद्दा आहे.

न्यायालयाने प्रतिवादींना पर्यायी जागा सुचविण्यास सांगितल्यामुळे आता पुढील सुनावणीत शिवप्रेमींच्या भावनांचा आदर राखून पुतळ्यासाठी दुसरी योग्य व अधिकृत जागा कोणती असू शकते, यावर मुख्य चर्चा होण्याची शक्यता आहे.

दरम्यान, मुरगाव बंदर प्राधिकरणाच्या हेडलँड सडा येथील जमिनीवर फेब्रुवारी महिन्यात छत्रपती शिवाजी महाराजांचा पुतळा बसविण्यात आला होता. मात्र, एमपीए प्रशासनाने या जागेवर पुतळा बसविण्यास कोणतीही अधिकृत परवानगी दिली नसल्याचे सांगत हा पुतळा बेकायदेशीर ठरवला आणि न्यायालयात धाव घेतली. उच्च न्यायालयाने यापूर्वी हा पुतळा हटविण्याचे आदेश दिले होते..