पणजी: राज्यात आज दिवसभर जोरदार पावसाने अक्षरशः धुमाकूळ घातला. गेल्या दोन-तीन महिन्यांपासून उष्णतेने त्रस्त झालेल्या नागरिकांना या पावसामुळे दिलासा मिळाला असला, तरी अनेक भागांत यामुळे जनजीवन विस्कळीत झाल्याच पाहायला मिळालं.

सकाळपासूनच पावसाने झोडपायला सुरुवात केलीय. काणकोणपासून पेडण्यापर्यंत राज्यातील बहुतेक भागांत संततधार सुरू होती. यामुळे अनेक रस्त्यांवर पाणी साचले, तर काही ठिकाणी वाहतुकीस अडथळा निर्माण झाला.

विशेष, म्हणजे खोर्ली उसपकर जंक्शनवर पाण्याचा लोट इतका होता की, एक दुचाकी थेट पाण्यात वाहून गेली. तर दुसरीकडे, एक महिला वाहता वाहता थोडक्यात वाचली. सुदैवाने या घटनेत कोणतीही जीवितहानी झाली नाही. या घटनेचा व्हिडिओ सध्या व्हायरल होत आहे.

पावसामुळे लोकांना छत्री, रेनकोट यांचा आधार घ्यावा लागला. काही ठिकाणी वीजपुरवठाही खंडित झाला असून, नागरिकांनी काळजीपूर्वक राहण्याचे आवाहन प्रशासनाने केले आहे.

या पावसामुळे उष्म्याने हैराण झालेल्या गोमंतकियांना काहीसा दिलासा मिळाला आहे, मात्र आज पावसाचा जबर तडाखा देखील सोसावा लागला आहे. रस्त्यांवर पाणी तुंबणे, घरांच्या छपरांमधून गळती, नाले तुंबणे, अशी स्थिती अनेक भागांत निर्माण झाली आहे.

गोवा हवामान विभागाने दोन दिवसांसाठी (२०, २१ मे) ऑरेंज अलर्ट दिला असून, पाच दिवसांसाठी यलो अलर्ट जारी केला आहे. आज (मंगळवार) राज्यात मुसळधार पावसाची शक्यता वर्तविण्यात आली आहे.

त्यामुळे हवामान खात्याने नागरिकांनी सुरक्षित स्थळी राहण्याचे आणि गरज असल्यासच घराबाहेर पडण्याचे आवाहन करण्यात आले आहे.