Goa Gram Sabha : अवेडे ग्रामसभेत आज उपसरपंचांच्या पतीला मारहाण झाल्‍याने बराच वादंग झाला. प्रभाग क्रमांक पाचमध्ये सरपंचांनी येऊ नये, असा मुद्दा उपस्‍थित केला गेल्‍याने निर्माण झालेल्‍या वादाचे रूपांतर मारहाणीत झाले. तर मार्ना-शिवोली ग्रामसभेत आरजी कार्यकर्त्यांनी व्‍हिडिओ रेकॉर्डिंग (चित्रीकरण) करण्‍याचा प्रयत्‍न केल्‍याने काहीकाळ तणाव निर्माण झाला होता.

अवेडे येथे आज ग्रामसभा झाली. यावेळी एका ग्रामस्थाने प्रभाग क्रमांक 5 मध्‍ये रस्ते ठीक नसल्याने आपली गाडी रस्त्यावरील खड्यात अडकून पडल्‍याचे सांगितले व सदर प्रश्‍‍नी सरपंचांनी लक्ष घालावे, अशी मागणी केली.

प्रभाग 5च्‍या पंच तथा उपसरपंच शिल्पा प्रभुदेसाई यांच्या अनुपस्थित त्यांचे पती गजानन प्रभुदेसाई यांनी सरपंचांनी प्रभाग पाचमध्ये लक्ष घालू नये; त्यांनी आपल्याच प्रभागात पाहावे, असे सांगितले असता साविओ नामक ग्रामस्थाने विधानावर हरकत घेतली.

सरपंच हे गावचे प्रमुख आहेत. त्‍यांना रोखता येणार नाही, असे त्‍यांनी म्‍हणताच प्रभुदेसाई व साविओ यांच्यात जबरदस्त शाब्दिक चकमक झाली. या वादाचे मारहाणीत रूपांतर झाले.

• यापूर्वीही प्रभुदेसाई यांनी प्रसाद नामक ग्रामस्थावर भर ग्रामसभेत खुर्ची उचलून मारण्याचा प्रयत्न केला होता, असा लोकांनी यावेळी दावा केला.

• उपसरपंच शिल्पा प्रभुदेसाई या पंचायतीच्या अनेक बैठकांमध्‍ये अनुपस्थित राहिल्या आहेत. आजही त्‍या ग्रामसभेत नव्‍हत्‍या.

• त्‍यामुळेच काही नागरिकांनी प्रभागातील समस्या सरपंचांसमोर मांडण्याचा प्रयत्न केला. पण, त्याला उपसरपंचांचे पती प्रभुदेसाई यांनी हरकत घेतल्याने आजची परिस्थिती उद्भवली, असे प्रत्‍यक्षदर्शीने सांगितले.

पोलिसांचा हस्‍तक्षेप, परिस्‍थिती नियंत्रणात

मार्ना-शिवोली ग्रामसभा आज बेकायदा बांधकामांवरून बरीच गाजली. ‘आरजी’चे स्थानिक नेते उद्देश पांगम व अन्य एकाने सभेचे चित्रीकरण करण्याचा प्रयत्न केला असता, ग्रामस्थ मयूर तोरस्कर तसेच सरपंच अभय शिरोडकर यांनी त्यांना रोखले.

परवानगीशिवाय ग्रामसभेचे चित्रीकरण करण्यास मनाई केली; परंतु आरजी कार्यकर्त्यांनी आपण त्‍यासाठी अधिकृत अर्ज केल्‍याचे सांगितले. बंदोबस्तासाठी उपस्थित पोलिसांनी सभेत हस्तक्षेप करीत परिस्‍थितीवर नियंत्रण मिळवले.