परवाना शुल्क वाढवून शैक्षणिक संस्था आणि धार्मिक स्थळांच्या 100 मीटर परिसरात दारू दुकानांना परवानगी दिल्याने तरुणांचे भविष्य उद्ध्वस्त होणार आहे, असे म्हणत दारूच्या दुकानांना शाळा आणि मंदिराजवळ परवानगी देणारी अधिसूचना मागे घेण्याची मागणी, विरोधी पक्षनेते युरी आलेमाव यांनी केली आहे.

दिवाळखोर भाजप सरकारने काटकसरीचे उपाय अवलंबून इव्हेंट आयोजनावर होणारा फालतू खर्च बंद करावा, असाही टोला आलेमाव यांनी लगावला आहे. शाळा आणि मंदिरासारख्या ठिकाणांचे पावित्र्य नेहमीच जपले जाणे आवश्यक असल्याचे आलेमाव म्हणाले.

सरकारच्या या निर्णयामुळे तरुणांचे भविष्य आणि गोव्याची ओळखच उद्ध्वस्त होईल, अशी चिंता त्यांनी व्यक्त केली. भाजप सरकारचे मानसिक संतुलन ढासळल्याचे दिसून येत आहे. 'पार्टी विथ अ डिफरन्स' चे सरकार आता सर्व काही वेगळ्या पद्धतीने करतेय, असे आलेमाव यांनी म्हटले.

स्वातंत्र्यसैनिक आणि त्यांच्या कुटुंबीयांचे श्रद्धास्थान असलेल्या पवित्र आग्वाद तुरूंगाच्या परिसरात मद्यविक्रीला भाजप सरकारने परवानगी दिली. आता शाळा आणि धार्मिक स्थळांच्या जवळ दारु दुकाने आणण्याचा भाजप सरकारचा डाव आहे. भाजप सरकार पैसे कमावण्यासाठी काहीही करेल, असे आलेमाव म्हणाले.

भाजप सरकार गोव्यातील दारू माफियांना आश्रय देत आहे. कर्नाटकचे मुख्यमंत्री सिद्धरामय्या यांनी केलेल्या गोव्यातून कर्नाटकात अवैध दारूची वाहतूक केली जाते, या विधानाची सरकारला माहितीच नाही. मला विधानसभेत दिलेल्या उत्तरावरून भाजप सरकार दारूच्या अवैध धंद्याकडे जाणीवपूर्वक डोळेझाक करत आहे हे स्पष्ट होते असा दावा युरी आलेमाव यांनी केला आहे.

शिक्षण आणि मंदिरांच्या शेजारी दारूच्या दुकानांना परवानगी देऊन महसूल वाढविण्याचा प्रयत्न करण्यापेक्षा दारूचा अवैध व्यापार थांबविण्यावर सरकारने भर दिला पाहिजे, असे युरी आलेमाव म्हणाले.