पणजी: सरकारी अधिकाऱ्याने लैंगिक अत्याचार केल्याची तक्रार २४ वर्षीय तरुणीने पणजी महिला पोलिस स्थानकात दाखल केली आहे. लग्नाचे आमिष दाखवून त्याने अत्याचार केल्याचे तक्ररीत नमूद करण्यात आले आहे. संशयित नागरी सेवेतील कनिष्ठ श्रेणीतील अधिकारी आहे.

२४ वर्षीय तरुणीने दाखल केलेल्या तक्रारीवरुन पोलिसांनी संशयिताविरोधात गुन्हा नोंद केला आहे. संशयित अधिकारी आणि पीडित तरुणी यांची मार्च २०२३ मध्ये एका कार्यक्रमात ओळख झाली होती. ओळखीचे रुपांतर मैत्रीत झाले. दोघांमधील संपर्क वाढल्यानंतर संशयिताने पीडित तरुणीला लग्नाचे आमिष दिले.

पीडित तरुणी लग्नाला तयार देखील झाली व त्यानुसार लग्नाची घरात बोलणी देखील सुरु झाली होती. दरम्यान, संशयित अधिकाऱ्याने मे २०२३ मध्ये दक्षिण गोव्यात लैंगिक अत्याचार केला, असा आरोप करण्यात आला आहे.

पीडित तरुणीच्या तक्रारीनुसार, अधिकाऱ्याविरोधात भारतीय न्याय संहिता कलम ६९, ११५(२) आणि ३५२ अंतर्गत गुन्हा नोंद करण्यात आला आहे. संशयिताचा त्याच्या घरी शोध घेण्यात आला पण, सध्या फरार असून, पोलिस त्याचा शोध घेत असल्याची माहिती समोर आली आहे.

समोर आलेल्या अधिकच्या माहितीनुसार, संशयित अधिकाऱ्याच्या कुटुंबीयांनी पीडित तरुणीच्या कुटुंबीयांशी वाद घातला. तसेच, दोघांच्या लग्नाला नकार देत तरुण आणि तिच्या कुटुंबीयांना देखील मारहाण केल्याचे तक्रारीत नमूद करण्यात आले आहे.