Goa Tourism : गोवा पर्यटन मंडळाच्या उच्चधिकार समितीची पहिली बैठक आज पणजीतील पर्यटन भवानात झाली. पर्यटन क्षेत्रात गोवा अग्रेसर राज्य करण्याच्या दृष्टीने यावेळी चर्चा करण्यात आली. पर्यटनाचा सर्वांगीण विकास होण्यासाठी पर्यटन खाते आणि गोवा पर्यटन विकास महामंडळ (जीटीडीसी) यांच्याकडून चांगल्या सुविधा मिळाल्यास त्याचा थेट फायदा राज्याला होऊ शकतो, असे पर्यटनमंत्री रोहन खंवटे यांनी सांगितले. येथे ते पत्रकारांशी बोलत होते.

पर्यटन मंडळ स्थापित करण्यामागचा हेतू हा पर्यटन क्षेत्राकडे दुर्लक्ष होणार नाही यासाठी आहे. त्या अनुषंगाने बैठकीत चर्चा झाली. अत्याधुनिक साधनसुविधा निर्माण करून आणखी पर्यटन क्षेत्र आकर्षित करण्याचे लक्ष्य पर्यटन खाते आणि जीटीडीसीने ठेवले आहे. यापूर्वी खाते आणि महामंडळाकडून निधी धार्मिक स्थळांवर खर्च करण्याचे प्रकार होत होते. आता सर्व पैलूंकडे लक्ष केंद्रित केले जाणार आहे, असेही खंवटे म्‍हणाले.