पणजी: स्थानिक युवकांना रोजगार संधी उपलब्ध करून देण्यासाठी (Goa) राज्य सरकारच्या कामगार खात्याच्या वतीने येत्या 27 ऑक्टोबर रोजी म्हापसा येथे, तर 30 ऑक्टोबर रोजी फोंडा येथे ‘स्वयंपूर्ण युवा’ कार्यक्रमाचे आयोजन केले असून यात देशभरातील 60 हून अधिक कंपन्या सहभागी होत असल्याची माहिती मुख्यमंत्री डॉ.प्रमोद सावंत (CM Pramod Sawant) यांनी दिली आहे. यावेळी कामगार मंत्री जेनिफर मोन्सेरात उपस्थित होत्या.

राज्यात होऊ घातलेल्या विधानसभा निवडणुकीच्या पार्श्वभूमीवर राज्य सरकार युवकांच्या रोजगार संधीबाबत सक्रीय झाले आहे. यासाठीच स्वयंपूर्ण युवा कार्यक्रमाचे आयोजन केले असून या कार्यक्रमांमध्ये राज्य सरकारच्या विविध खात्यांबरोबरच 60 हून अधिक खासगी कंपन्या, बँका सहभागी होणार आहेत. या कार्यक्रमांमध्ये रोजगार संधीबरोबरच स्वयंरोजगारासाठीच्या वेगवेगळ्या प्रकारच्या योजना आणि संधी यांची ही माहिती देण्यात येणार आहे. याशिवाय युवक युवतींसाठी करियरसाठीचे मार्गदर्शनही करण्यात येणार आहे.

यापूर्वी साखळी आणि ताळगाव येथे अशा कार्यक्रमांचे आयोजन केले होते. आता या कार्यक्रमाचे स्वरूप वाढवण्यात आले असून अनेक खासगी उद्योग, संस्थांना यासाठी बोलावण्यात आले आहे. या रोजगार मेळाव्यात 1 हजारहून अधिक रोजगाराच्या संधी उपलब्ध होतील. यासाठी सरकारी पोर्टलवर नाव नोंदणी करा किंवा सकाळी प्रत्यक्ष नोंदणी करू शकता, अशी माहिती मुख्यमंत्र्यांनी दिली आहे.

राज्य सरकारच्यावतीने 10 हजार नोकऱ्यांचे आश्वासन देण्यात आले होते. त्यापैकी आठ हजार नोकऱ्यांची जाहिरात काढण्यात आली आहे. यापैकी एक हजारहून अधिक नोकऱ्यांची सर्व प्रक्रिया 19 डिसेंबर पूर्वी पूर्ण करण्यात येणार आहे.

- डॉ. प्रमोद सावंत, मुख्यमंत्री