पणजी: राज्य मंत्रिमंडळाकडून बार्देश आणि पेडणे तालुक्यातील जमिनीच्या किमान किमतीमध्ये १३० टक्क्यांची दरवाढ केली असल्याने इथे नवीन जागा विकत घेणं महागणार आहे.

मुख्यमंत्री डॉ. प्रमोद सावंत यांनी दिलेल्या माहितीनुसार 500 sqm पर्यंत घर बांधणीसाठी जागा विकत घेणाऱ्यांना जुना दर लागू होईल, तसेच स्थानिकांवर या निर्णयाचा परिणाम होणार नाही.

दरांमध्ये केलेल्या बदलांमुळे 3000 प्रति चौ.मी वरून किंमत थेट 8000 प्रति चौ.मी पर्यंत वाढेल आणि व्यावसायिक कारणांसाठी मालमत्ता खरेदी करणाऱ्या लोकांना ही नवीन किंमत मोजावी लागणार आहे.

गेल्या अनेक काळापासून विविध कलाकार, क्रिकेटपटू आणि राजकारण्यांसाठी बार्देश आणि पेडणे हे दोन तालुके प्रमुख आकर्षण बनले आहेत.

सदर निर्णयामधून सरकारी खजिना वाढायला मदत होईल, राज्यातील इतर तालुक्यांजवळ लक्ष केंद्रित केले जाईल आणि दिवसेंदिवस वाढणाऱ्या मागणीमुळे बार्देश आणि पेडणे इथे सुरु असलेल्या बांधकामावर काहीसा निर्बंध लावायला मदत मिळेल असे मुख्यमंत्री डॉ.सावंत म्हणाले.