पणजी : गोव्यात पूर्व प्राथमिक शाळांमध्ये म्हणजेच केजीच्या प्रवेशासाठी मुलांची वयोमर्यादा अडीच वर्षे करण्यात आली आहे. नर्सरी वर्गांसाठी परवानगी असलेल्या शिक्षण संस्थांना शिक्षण खात्याने तशा सूचना दिल्या आहेत. मागच्याच वर्षी गोवा सरकारने ही मर्यादा 3 वर्षांच्या वर ठेवण्याचे निर्देश दिले होते.

गोव्यात केजी म्हणजेच पूर्व प्राथमिक शाळेच्या प्रवेशासाठीची मर्यादा सरकारने अडीच वर्षांवर आणली आहे. यापूर्वी ही मर्यादा तीन वर्षांची म्हणजेच आताच्या मर्यादेपेक्षा सहा महिन्यांनी जास्त होती. मागच्याच वर्षी जून महिन्यात राज्य सरकारने (Goa Government) हीच मर्यादा तीन वर्षांवर नेली होती. राष्ट्रीय शिक्षण धोरण 2020 मधील तरतुदींनुसार तसे निर्देश देण्यात आले होते.

31 मे रोजी वयाची तीन वर्षं पूर्ण केलेल्या मुलांनाच पूर्व प्राथमिक शाळांमध्ये (School) प्रवेश देण्यात येईल असे शिक्षण खात्याने आदेश काढले होते. आता याच आदेशाला शिथिलता देत वयोमर्यादा सहा महिन्यांनी कमी करण्यात आली आहे. याचा फायदा हजारो विद्यार्थ्यांना होणार आहे. राज्य सरकारच्या मागील आदेशाला अनेक पालकांनी आव्हान देत मर्यादा कमी करण्याची मागणी केली होती. गोवा (Goa) दीव आणि दमण शालेय शिक्षण कायदा 1984 चा आधार घेत मर्यादा शिथिल केल्याचं शिक्षण खात्याने म्हटलं आहे. तसंच 31 मे रोजी अडीच वर्षांखालील मुलांना प्रवेश न देण्याच्या सूचनाही करण्यात आल्या आहेत.