पणजी: नगरनियोजन खात्याने (टीसीपी) राज्‍यातील आणखी सुमारे १२.९६ लाख चौरस मीटर जमीन नो-डेव्हलपमेंट झोनमध्ये (एनडीझेड) आणली आहे. मुख्य नगरनियोजक वेर्टिका डागुर यांनी याबाबतची अधिसूचना जारी केली आहे.

फोंडा, बार्देश, काणकोण, तिसवाडी, डिचोली, मुरगाव आणि सासष्‍टी या सात तालुक्‍यांतील १२,९६,३१९ चौरस मीटर जमीन ‘एनडीझेड’अंतर्गत आणण्यात आली आहे, असे डागुर यांनी जारी केलेल्या अधिसूचनेत म्हटले आहे.

दरम्‍यान, पर्यावरण संरक्षण, शाश्वत विकास, पूर व नैसर्गिक आपत्तींपासून बचाव, मच्छीमार आणि शेतकऱ्यांच्या पारंपरिक हक्कांचे रक्षण, तसेच भूजल पातळी टिकवून ठेवण्याच्या उद्देशाने ‘टीसीपी’ने राज्यातील खारफुटी, खाजन, कमांड एरिया, जलस्रोतांच्या आसपासची जमीन, भातशेती, क्रीडांगणे, मीठागरे आदी परिसरांतील जमिनींचे रूपांतरण न करण्याचा निर्णय घेतला आहे.