मडगाव: भाजपला सत्तेवरून दूर करण्यासाठी सर्व समविचारी विरोधी पक्षांनी एकत्र येऊन निवडणूक लढवावी, अशी हाक गोवा फॉरवर्ड पक्षाने पुन्हा दिली आहे. पक्षाच्या राज्य कार्यकारिणीच्या शुक्रवारी झालेल्या बैठकीत सर्व समविचारी पक्षांशी तातडीने चर्चा सुरू करण्याचा ठराव संमत करण्यात आला.

गोवा फॉरवर्ड काँग्रेसशी युती करणार की काँग्रेसमध्ये विलीन होणार, याबाबत राजकीय वर्तुळात चर्चा सुरू असताना हा निर्णय घेण्यात आला आहे. पक्षाध्यक्ष विजय सरदेसाई यांच्या अध्यक्षतेखाली झालेल्या बैठकीत भाजपच्या कथित हुकूमशाही, भ्रष्टाचार आणि सूडबुद्धीच्या राजकारणाला आळा घालण्यासाठी विरोधकांनी एकाच मंचावर येण्याची गरज व्यक्त करण्यात आली.

जनभावनेचा आदर करून भाजपला सत्तेतून दूर करण्यासाठी काँग्रेससह अन्य विरोधी पक्षांशी तातडीने चर्चा करण्यात येईल, असे सरदेसाई यांनी सांगितले. दरम्यान, गोव्यातील निवडणूक प्रक्रियेतील कथित गैरप्रकारांबाबतही बैठकीत चिंता व्यक्त करण्यात आली. मतदारांची नावे चुकीच्या पद्धतीने वगळली जात असल्याचे ठोस पुरावे असल्याचा दावा गोवा फॉरवर्डने केला आहे.