Illegal Animal Hunting In Goa: गोव्यातील वनसंपदा आणि वन्यजीवांच्या संरक्षणासाठी कार्यरत असलेल्या वन विभागाने एक मोठी कारवाई केली आहे. नेत्रावळी वन्यजीव अभयारण्याच्या सीमेवर प्राण्यांची अवैध शिकार करण्यासाठी अत्यंत धोकादायक पद्धतीचा वापर केल्याप्रकरणी नेत्रावळी वन विभागाने गुरुदास महादेव कुस्केकर या व्यक्तीला अटक केली. आरोपीने आपल्या जागेतून जाणाऱ्या 11 केव्हीच्या मुख्य विद्युत वाहिनीला थेट आकडा टाकून विद्युत प्रवाह वन्यजीव अभयारण्याच्या सीमेवर सोडला होता.

दरम्यान, ही अत्यंत क्रूर आणि धोकादायक पद्धत आहे, जी केवळ प्राण्यांसाठीच नव्हे, तर मानवी जीवनासाठीही गंभीर धोका निर्माण करते. वन विभागाच्या अधिकाऱ्यांना नियमित गस्त घालत असताना ही धक्कादायक बाब लक्षात आली. या अवैध विद्युत तारेच्या सापळ्यात सापडून कोणत्याही निष्पाप प्राण्याचा जीव जाऊ शकला असता, तसेच याच मार्गावर गस्त घालणाऱ्या वन अधिकाऱ्यांच्या जीवालाही धोका होता.

धोकादायक पद्धतीमुळे मानवी जीवांनाही धोका

वन विभागाच्या अधिकाऱ्यांनी दिलेल्या माहितीनुसार, कुस्केकर यांनी वन्य प्राण्यांना ठार मारण्यासाठी ही विद्युत तार लावलेली होती. या पद्धतीचा वापर गोव्यात यापूर्वीही करण्यात आला असून त्याचे गंभीर परिणाम समोर आले आहेत. रिवण येथे अशाच प्रकारे लावलेल्या विद्युत तारेच्या संपर्कात आल्याने दोन सख्ख्या भावांचा दुर्दैवी मृत्यू झाला होता. ती घटना ताजी असतानाही कुस्केकर यांनी त्याच पद्धतीचा अवलंब करुन स्वतःचा आणि इतरांचा जीव धोक्यात घातला.

वन अधिकाऱ्यांनी ही विद्युत तार पाहिल्यानंतर तातडीने सावधगिरी बाळगत तपासणी केली आणि ही अवैध जोडणी शोधून काढली. ही कारवाई वेळेवर झाल्यामुळे एक मोठा अपघात टळला. अधिकाऱ्यांनी दाखवलेल्या सतर्कतेमुळे कुस्केकर यांचे कृत्य उघडकीस आले.

वन्यजीव संरक्षण कायद्याअंतर्गत गुन्हा दाखल

गुरुदास कुस्केकर यांच्या या कृत्याला अत्यंत गंभीर गुन्हा मानून वन विभागाने त्यांच्याविरुद्ध कठोर कारवाई केली आहे. वन्यजीव संरक्षण कायदा, 1972 च्या कलम 9 आणि 32 अंतर्गत त्यांच्यावर गुन्हे दाखल करण्यात आले आहेत. या कायद्यानुसार, संरक्षित वन्यजीवांची शिकार करणे किंवा त्यांना कोणत्याही प्रकारे इजा पोहोचवणे हा दंडनीय गुन्हा आहे. दोषी आढळल्यास कठोर शिक्षेची तरतूद कायद्यात आहे.

अटक करण्यात आल्यानंतर कुस्केकर यांना पुढील कायदेशीर कार्यवाहीसाठी न्यायालयात हजर करण्यात येईल. वन विभागाच्या अधिकाऱ्यांनी या कारवाईनंतर पुन्हा एकदा वन्यजीवांच्या संरक्षणासाठी आपली कटिबद्धता व्यक्त केली आहे. त्यांनी अशा अवैध आणि धोकादायक कृत्यांबद्दल स्थानिक लोकांना सावध राहण्याचे आवाहन केले आहे.

गेल्या काही वर्षांमध्ये गोव्यात (Goa) वन्यजीवांच्या शिकारीचे प्रकार वाढले आहेत. शिकारी केवळ बंदुकांनी किंवा सापळ्यांनीच नव्हे, तर अशा धोकादायक पद्धतींनीही वन्यजीवांचा जीव घेत आहेत. नेत्रावळीसारख्या घनदाट वनक्षेत्रात प्राण्यांचे नैसर्गिक अधिवास धोक्यात येत आहेत, ज्यामुळे ते मानवी वस्तीजवळ येत आहेत. यातून मानव-वन्यजीव संघर्ष वाढत असून, कुस्केकर यांच्यासारखी कृत्ये त्यात भर घालत आहेत.

वन विभागाने या प्रकरणाचा तपास अधिक सखोल करण्यासाठी पावले उचलली असून, यात आणखी कोणी सहभागी आहे का, याचाही शोध घेतला जात आहे. ही कारवाई वन्यजीवांची शिकार करणाऱ्या इतर व्यक्तींसाठी एक कडक संदेश आहे की, अशा कृत्यांवर वन विभाग बारकाईने लक्ष ठेवून आहे.