मडगाव: बाणावली येथील दांडो मैदानावर फुटबॉल सामन्यादरम्यान मंगळवारी (३० जून) सायंकाळी डेलन नॅथॅलिनो कार्व्हालो (वय २६) या खेळाडूचा दुर्दैवी मृत्यू झाला.

डेलन हा केपे तालुक्यातील बाणावली येथील रहिवासी असून, युनायटेड बॉईज ऑफ आंबावली या संघासाठी तो खेळत होता. अनैसर्गिक मृत्यू म्हणून कोलवा पोलिसांनी या घटनेची नोंद केली असून, पोलिस निरीक्षक विदेश शिरोडकर यांच्या मार्गदर्शनाखाली पुढील तपास सुरू आहे.

माहितीनुसार, युनायटेड बॉईज ऑफ आंबावली विरुद्ध गार्डियन एंजल स्पोर्ट्स यांच्यात हा फुटबॉल सामना सुरू होता. स्पोर्टिंग क्लब काणा-बाणावली यांच्या वतीने या फुटबॉल स्पर्धेचे आयोजन करण्यात आले होते.

सामना सुरू असताना डेलनने फुटबॉलला हेडर मारण्याचा प्रयत्न केला आणि त्याच वेळी तो जमिनीवर कोसळला. त्यानंतर उठून त्याने पुन्हा खेळण्याचा प्रयत्न केला; मात्र काही मिनिटांतच तो पुन्हा खाली कोसळला.