पणजी: बर्च बाय रोमिओ लेनचे मालक गौरव आणि सौरभ लुथरा यांच्या पोलिस कोठडीत चार दिवसांची वाढ करण्यात आली आहे. दोघांना आज (२६ डिसेंबर) दुपारी म्हापसा प्रथमवर्ग न्यायालयात हजर केले असता त्यांच्या पोलिस कोठडीत २९ डिसेंबरपर्यंत वाढ केलीय. लुथरा बंधुंनी यावेळी तपासाह सहकार्य करण्याचे न्यायालयाला सांगितले.

बनावट कागदपत्र संबधित प्रकरणात लुथरा बंधुंनी अटकपूर्व जामीनासाठी अर्ज केला आहे. दुसरीकडे म्हापसा अतिरिक्त सत्र न्यायालयाने आगीच्या घटनेतील दुसरा संशयित भरत कोहली याला सशर्त जामीन मंजूर केला आहे. ५० हजार रुपयांच्या हमीवर न्यायालयाने भरत कोहलीला जमीन दिला आहे. भरत नाईटकल्बचे रोजचे व्यवस्थापन आणि कामकाज पाहण्याचे काम करत होता.

बनावट कागदपत्र संबंधित प्रकरणी गौरव आणि सौरभ लुथरा बंधुंविरोधात म्हापसा पोलिसांनी गुन्हा नोंद केला आहे. याप्रकरणी लुथरा बंधुंनी अटकपूर्व जामिनासाठी म्हापसा अतिरिक्त सत्र न्यायालयात अर्ज केला आहे. जीएस हॉस्पिटॅलिटी गोवा हडफडे कंपनीचा एक संचालक अजय गुप्ता अगोदरच पोलिस कोठडीत आहे.

हडफडे येथील बर्च बाय रोमिओ लेन या नाईटक्लबमध्ये लागलेल्या आगीत २५ जणांचा मृत्यू झाला होता. यात पर्यटक आणि क्लबमधील कर्मचाऱ्यांचा समावेश होता. या घटनेनंतर क्लबचे मालक लुथर बंधू थायलंडला फरार झाले होते. गेल्या आठवड्यात भारतात आणल्यानंतर गोवा पोलिसांनी दोघांना अटक केली.