Goa Filmcity: लोलये कोमुनिदादच्या आज झालेल्या भाग धारकांच्या सर्वसाधारण बैठकीत मनोरंजन सोसायटीला भगवती पठारावर जमीन देण्याचा ठराव बहुमताने संमत करण्यात आला आहे, असे लोलये कोमुनिदाद संस्थेचे अध्यक्ष विश्वजीत वारिक यांनी सांगितले.

बैठकीला 54 भागधारक उपस्थित होते, त्यापैकी एकाच कुटुंबातील चार भागधारकांनी ठरावाला विरोध दर्शविला. मात्र, बहुमताने लोलये गावच्या विकासाला हातभार लावण्यासाठी लोलये कोमुनिदाद संस्थेच्या भागधारकांनी हा ठराव बहुमताने संमत केल्याचे वारिक यांनी सांगितले.

यापूर्वी लोलये कोमुनिदाद संस्थेची बैठक व लोलये पंचायतीची ग्रामसभा एकाच दिवशी बोलाविण्यात आल्याने त्या निर्णयाला काही ग्रामस्थांनी व कोमुनिदाद संस्थेच्या काही भागधारकांनी आक्षेप घेतला होता.

त्यानुसार लोलये - पोळे पंचायतीने रविवारी (ता.4) सकाळी 10 वाजता निश्चित केलेली ग्रामसभा पुढे ढकलली होती. तरीही 128 भागधारकापैकी फक्त 54 जण बैठकीला उपस्थित राहिले.

लोलये ग्रामस्थांचा मोर्चा

लोलये कोमुनिदाद संस्थेच्या सर्वसाधारण बैठकीच्या पाश्र्वभूमीवर लोलये ग्रामस्थांनी भगवती पठारावर होऊ घातलेल्या फिल्मसिटी व अन्य प्रकल्पांना विरोध करण्यासाठी आज लोलयेत शांततापूर्ण रॅली काढून निषेध नोंदविला.

ही रॅली लोलये येथील जैव संवेदनशील भगवती पठारावर फिल्मसिटी व अन्य प्रकल्प नको, या मागणीसाठी काढण्यात आली, असे लोलयेच्या जैवविविधता समितीचे अध्यक्ष मनोज प्रभुगावकर यांनी सांगितले. या रॅलीत लोलयेतील सुमारे 150 ग्रामस्थांनी भाग घेतला.