कुळे: राज्यात गेल्या काही दिवसांपासून अपघातांच्या घटनांमध्ये वाढ झालीय. दरम्यान रविवारी (दि. १ जून) कुळे वाकीकुयण-शिगाव रस्त्यावर तीन वाहनांचा भीषण अपघात घडला. या अपघातात एका दुचाकीस्वाराचा दुर्दैवी मृत्यू झाला असून दुसरा दुचाकीस्वार सुदैवाने थोडक्यात बचावला आहे.

समोर आलेल्या माहितीनुसार, वाकीकुयण-शिगाव रस्त्यावर चारचाकी आणि 2 दुचाकी वाहनांचा भीषण अपघात झाला. या धडकेत एक दुचाकीस्वार जागीच ठार झाला. दुसऱ्या दुचाकीवरील युवकाने प्रसंगावधान राखत आपल्या दुचाकीवरून उडी घेतल्याने त्याचा जीव वाचला. या घटनेने परिसरात एकच खळबळ उडाली असून स्थानिक नागरिकांनी तात्काळ मदतीसाठी धाव घेतली.

अपघाताची माहिती मिळताच पोलिस घटनास्थळी दाखल झाले आहेत. अपघातग्रस्त वाहने बाजूला करण्यात आली असून पंचनामा व अधिक तपास सुरू आहे. मृत व्यक्तीची ओळख पटवण्याचे काम सुरू असून अपघाताचं नेमकं कारण अद्याप अस्पष्ट आहे.

गेल्या काही आठवड्यांपासून राज्यात अपघातांची मालिका सुरू असून रस्त्यावरील सुरक्षिततेबाबत प्रश्नचिन्ह निर्माण झाले आहे. वाहतूक नियंत्रण, गतिमान वाहनांची भरधाव वेगाने होणारी वाहतूक यामुळे अशा घटना घडत आहे.