Bicholim Fake Police Robbery Case : गोव्यातील विविध भागांत पोलिसांच्या नावाखाली वृद्ध महिलांना लुटणाऱ्या दोन अट्टल चोरट्यांच्या मुसक्या आवळण्यात डिचोली पोलिसांना यश आले आहे. ७ जानेवारी २०२६ रोजी एका नाट्यमय पाठलागानंतर या तोतया पोलिसांना अटक करण्यात आली. हे संशयित गेल्या अनेक दिवसांपासून पोलिसांचे सोंग घेऊन सर्वसामान्यांना गंडा घालत होते, मात्र अखेर ते खाकी वर्दीच्या तावडीत सापडले आहेत.

अस्नोडा जंक्शनवर संशयास्पद हालचाली

मिळालेल्या माहितीनुसार, अस्नोडा जंक्शन परिसरात एक होंडा शाइन मोटारसायकलवर संशयास्पदरीत्या ते फिरत असल्याची माहिती गस्तीवर असलेल्या पोलिसांना मिळाली होती. हे दोन्ही संशयित त्या परिसरात फिरून विशेषतः वृद्ध महिलांवर लक्ष ठेवून होते. पोलीस असल्याचे भासवून ते महिलांना बोलण्यात गुंतवून त्यांची दिशाभूल करण्याचा प्रयत्न करत असल्याचे पोलिसांच्या लक्षात आले.

पोलिसांचा थरारक पाठलाग आणि अटक

संशयितांच्या हालचालींवर पोलीस उपनिरीक्षक (PSI) एस. कामत आणि पोलीस कॉन्स्टेबल दयेश खांडेपारकर यांनी गुप्तपणे पाळत ठेवली. जेव्हा या अधिकाऱ्यांनी त्यांना थांबवण्याचा प्रयत्न केला, तेव्हा चोरट्यांनी पळून जाण्याचा प्रयत्न केला. यानंतर डिचोली पोलिसांच्या पथकाने त्यांचा पाठलाग सुरू केला. काही अंतरापर्यंत चाललेल्या या फिल्मी स्टाईल थरारानंतर पोलिसांनी या दोन्ही भामट्यांना घेराव घालून जेरबंद केले.

राज्यभरातील गुन्ह्यांशी संबंध

प्राथमिक तपासात असे समोर आले आहे की, या टोळीचा गोव्यातील विविध पोलीस ठाण्यांच्या हद्दीत झालेल्या चोरीच्या घटनांशी जवळचा संबंध आहे. वृद्ध महिलांना सोन्याचे दागिने सुरक्षित ठेवण्याच्या बहाण्याने लुबाडणे, हा या तोतया पोलिसांचा मुख्य उद्देश असायचा. या अटकेमुळे अनेक चोरीच्या प्रकरणांचा छडा लागण्याची शक्यता पोलिसांनी वर्तवली आहे. सध्या पोलीस या प्रकरणाचा अधिक तपास करत असून त्यांच्याकडून आणखी माहिती मिळवण्याचा प्रयत्न सुरू आहे.