Mauvin Godinho About Business In Goa

पणजी: राज्यात उद्योजकांना सक्षम करणारे, नावीन्याला चालना देणारे आणि वित्तीय-तंत्रज्ञानाला सुलभ प्रवेश मिळवून देणारे व्यवसायस्नेही वातावरण निर्माण करणे आवश्यक आहे, असे उद्‌गार उद्योगमंत्री माविन गुदिन्हो यांनी येथे काढले.

‘असोचॅम’च्या गोवा परिषदेने सूक्ष्म, लघू व मध्यम उद्योगांसाठी ‘क्षमता, संधी व पुढील वाटचाल’ विषयावरील कार्यशाळेच्या उद्‍घाटनप्रसंगी ते बोलत होते. त्यांनी महिला उद्योजकता आणि ग्रामीण अर्थव्यवस्थेला प्रोत्साहन देण्याचे महत्त्व अधोरेखित केले.

नाबार्डचे महाव्यवस्थापक संदीप धारकर यांनी ग्रामीण औद्योगिकीकरणाला आर्थिक प्रगतीचा महत्त्वाचा घटक म्हणून अधोरेखित केले.

ग्रामीण भागातील लोकसंख्येचे कौशल्य वाढवणे, पायाभूत सुविधा सुधारणे, नागरिकांमध्ये समान संधी निर्माण करणे आणि महिलांचे सक्षमीकरण यावर त्यांनी भर दिला.

सूक्ष्म, लघू व मध्यम उद्योग विभागाचे सहसंचालक एम. के. मीना यांनी हे क्षेत्र सशक्त करण्यासाठी असलेल्या विविध योजनांची माहिती दिली. असोचॅमच्या गोवा परिषदेचे प्रमुख मांगिरीश पै रायकर, डॉ. सागर साळगावकर दीपाली नाईक यांची उपस्थित होते.