Tuem: तुये गावात अखंडीत वीज पुरवठा सुरू व्हावा यासाठी तेथे लाईन टाकण्यासाठी रस्ता खोदला खरा पण, त्यात 11 केव्हीची केबल टाकलीच नसल्याने वीज खात्याचा सावळागोंधळ समोर आला आहे.

खोदलेला रस्ता बंद केल्यानंतर आता पुन्हा केबल टाकण्यासाठी रस्ता खोदावा लागणार असल्याने स्थानिकांनी संताप व्यक्त केला आहे.

ऐन पावसाळ्यात तुये गावात वीज केबल टाकण्यासाठी रस्ता खोदण्यात आला. खोदलेला रस्ता बंद केल्यानंतर त्यावर हॉट मिक्सिंग करुन रस्ता पूर्ववत होईल अशी अपेक्षा गावकऱ्यांची होती. पण, खोदलेल्या मार्गात वीज खात्याने 11 केव्हीची केबल टाकण्यास वीज खाते विसरले आणि खोदलेला मार्ग तसाच बंद केल्याची धक्कादायक बाब समोर आली.

केबल टाकली नसल्याने आता पुन्हा हा रस्ता खोदण्याची नामुष्की आली आहे. वीज खात्याने अक्षम्य दुर्लेक्ष केल्याचा फटका स्थानिकांना बसला आहे. अखंडीत वीज नाहीच शिवाय रस्ताही मागील बऱ्याच दिवसांपासून वाहतूक योग्य नसल्याची तक्रार स्थानिक करत आहेत.

रस्ता पूर्वीपासून खराब स्थितीत होता तरीही गावकरी त्याच रस्त्याने नाईजास्तव प्रवास करत होते. गावात अखंडीत वीज पुरवठा व्हावा या उद्देशाने खोदलेल्या खड्यात ११ केव्हीची केबल टाकली नसल्याने वीज खात्याच्या कारभारावरही टीका केली जात आहे.

दरम्यान, वीज खात्याने झालेल्या चुकीची जबाबदारी घेतली आहे. खोदलेल्या खड्यात 33 केव्हीची केबल टाकण्यात आली मात्र, अनावधानाने 11 केव्हीची केबल टाकण्याची राहिली. खात्याच्या वतीने लवकरात लवकर हे काम पूर्ण करण्यात येईल अशी ग्वाही देण्यात आली आहे.