पणजी: शिक्षणासाठी घेतलेल्‍या कर्जाची तब्‍बल ५१०८ खाती सद्य:स्‍थितीत नॉन-परफॉर्मिंग अ‍ॅसेटमध्‍ये (एनपीए) असून, विविध बँकांमध्‍ये ४८१ कोटींचे कर्ज थकीत असल्‍याचे केंद्र सरकारने जारी केलेल्‍या एका अहवालातून समोर आले आहे. गेल्‍या दहा वर्षांत गोव्‍यात ‘एनपीए’मध्‍ये गेलेली शैक्षणिक कर्जांची खाती आणि थकीत रकमेचा सविस्‍तर आढावा या अहवालातून देण्‍यात आला आहे.

मार्च २०१६ मध्‍ये अशा प्रकारची ३२४६ खाती ‘एनपीए’मध्‍ये होती आणि थकीत रक्कम ११३ कोटी इतकी होती. परंतु दहा वर्षांत ‘एनपीए’ खाती आणि त्‍यातील थकीत रकमेतही वाढ होत गेल्‍याचे अहवालातून दिसून येते.

गोव्‍यासह देशभरात शैक्षणिक कर्जांची खाती मोठ्या प्रमाणात ‘एनपीए’मध्‍ये जात असल्‍याचे लक्षात आल्‍यानंतर कर्जे वसूल करण्‍यासाठी भारतीय रिझर्व्ह बँकेने देशभरातील बँकांसाठी मार्गदर्शक तत्त्‍वे लागू केलेली होती.

त्‍यात अशा कर्जांच्‍या वसुलीसाठी एजंट्सची नियुक्ती करताना योग्य तपासणी प्रक्रिया राबवावी, बँकांनी कर्जदाराला वसुली एजन्सी फर्म्स किंवा कंपन्यांची माहिती द्यावी, वसुली एजन्सीकडे डिफॉल्ट प्रकरणे पाठवताना वसुली एजंट्सने ग्राहकांना केलेले कॉल्‍स रेकॉर्ड केले आहेत का,

याची बँकांनी खात्री करावी, नियुक्त केलेल्या वसुली एजन्सी फर्म्स किंवा कंपन्यांची अद्ययावत माहिती बँकेच्या वेबसाईटवर पोस्ट करावी, कर्ज वसूल करण्याच्या प्रयत्नात कोणत्याही व्यक्तीविरुद्ध कोणत्याही प्रकारची धमकी किंवा छळवणूक होणार नाही, याची बँकांनी कडकपणे काळजी घ्‍यावी,

एजंटकडून मोबाईलवर किंवा सोशल मीडियाद्वारे अनुचित संदेश पाठवणे, धमकी देणे, निनावी कॉल करणे, कर्जदाराला सतत कॉल करणे किंवा कर्जदाराला सकाळी ८ पूर्वी आणि संध्याकाळी ७ नंतर कॉल करणे कायदेशीररीत्‍या चुकीचे असून त्‍याकडे बँकांनी लक्ष द्यावे, असे म्‍हटले होते.

वर्ष खाती रक्कम

२०१६ ३,२४६ ११३

२०१७ ३,४२७ १२९

२०१८ ४,३९३ १६५

२०१९ ४,७०८ १८३

२०२० ४,६४५ २१९

२०२१ ४,२८५ २३९

२०२२ ४,१५१ २७६

२०२३ ४,३७२ ३३९

२०२४ ४,९८५ ४०७

२०२५ ५,१०८ ४८१