पणजी: गोव्याचे पहिले मुख्यमंत्री भाऊसाहेब बांदोडकर यांच्या जयंतीनिमित्त आयोजित कार्यक्रमात कळंगुटचे आमदार मायकल लोबो यांनी राज्यातील शिक्षण व्यवस्थेबाबत महत्त्वाचे विधान केले आहे. भाऊसाहेब बांदोडकरांनी सुरू केलेल्या शाळा टिकवायच्या असतील, तर प्राथमिक शिक्षण इंग्रजी माध्यमातून सुरू करणे गरजेचे असल्याचे त्यांनी म्हटले आहे. सध्या गोव्यातील शिक्षण क्षेत्रात अनेक बदल होत आहेत. अशा परिस्थितीत आमदार मायकल लोबो यांचे विधान महत्त्वाचे ठरले आहे.

"शाळा इंग्रजी माध्यमातून करा"

आमदार मायकल लोबो यांच्या मते, भाऊसाहेब बांदोडकरांनी सुरू केलेल्या शाळा टिकवण्यासाठी त्या इंग्रजी माध्यमातून सुरू करणे गरजेचे आहे. प्राथमिक शाळा टिकवायच्या असतील, तर यामध्ये कोणीही राजकारण आणू नये. इंग्रजी माध्यमाच्या शाळांमध्ये कोकणी आणि मराठी भाषा अनिवार्य करणेही महत्त्वाचे असल्याचे ते म्हणाले.

गोव्यातील अनेक शाळा सध्या इंग्रजी माध्यमातून सुरू आहेत आणि या शाळा चांगली कामगिरी करत असल्याने पालकांचा कल प्राथमिक शाळांकडे आहे. राज्यातील सरकारी प्राथमिक शाळा बंद होण्याच्या मार्गावर असल्याने सरकार या शाळा स्वयंसेवी संस्थांना देण्याचा विचार करत आहे.

गोव्यातील सरकारी प्राथमिक शाळा सुरू राहाव्यात यासाठी सरकार वेळोवेळी त्यांची दुरुस्ती करते, शिक्षकांचे पगारही वाढवते, तरीही या शाळा बंद होत आहेत. भाषेचा वाद शिक्षणामध्ये येऊ नये, असे सांगत आमदार लोबो यांनी गोव्यातील प्राथमिक शाळा इंग्रजी माध्यमातून असाव्यात, असे मत व्यक्त केले.