पणजी: वाहतूक नियमांचे उल्लंघन रोखण्यासाठी ई-चलन प्रणाली प्रभावी ठरत असली, तरी प्रणालीतील मानवी चुका वाहनधारकांसाठी मनस्ताप ठरू शकतात, याचा प्रत्यय एका वाहनधारकाला आला. कोणताही नियमभंग न करता त्याच्या नावावर ई-चलन जारी करण्यात आले. अखेर संबंधित अधिकाऱ्यांच्या हस्तक्षेपानंतर ही चूक दुरुस्त करण्यात आली.

संबंधित वाहनधारकाने आपल्या अनुभवाची माहिती समाजमाध्यमावर शेअर केली आहे. मार्च महिन्याच्या मध्यात त्यांच्या मोबाईलवर वाहतूक नियमभंगाबाबत ई-चलन जारी झाल्याचा संदेश आला. त्यामध्ये दंडाची रक्कम भरण्याचे नमूद होते. मात्र, संपूर्ण मार्च महिन्यात ते गोव्याबाहेर होते आणि संबंधित वाहनाचाही वापर झाला नव्हता. त्यामुळे त्यांना आश्चर्याचा धक्का बसला.

नेमके काय घडले?

१ मार्चमध्ये वाहनधारकाच्या मोबाईलवर वाहतूक नियमभंगाचे ई-चलन जारी झाल्याचा संदेश आला. मात्र, त्या काळात ते गोव्याबाहेर होते आणि संबंधित वाहनाचाही वापर झाला नव्हता.

२ ई-चलन तपासल्यानंतर मोटारकारच्या नावावर चलन असले, तरी छायाचित्रात भाडेतत्त्वावरील दुचाकी असल्याचे दिसून आले. वाहन क्रमांकातील साधर्म्यामुळे चुकीची नोंद झाल्याचे स्पष्ट झाले.

३ वाहनधारकाने प्रादेशिक परिवहन कार्यालय आणि वाहतूक पोलिसांकडे तक्रार केली. चौकशीनंतर संबंधित कर्मचाऱ्याने ई-चलन चुकीने जारी झाल्याची कबुली दिली.

४ मात्र, एकदा ई-चलन जारी झाल्यानंतर ते थेट रद्द करता येत नसल्याचे सांगण्यात आले. काही वेळाने ‘एम परिवहन’ संकेतस्थळावर त्याची स्थिती ‘निकाली काढले’ अशी दिसू लागली.

५ नंतर संबंधित ई-चलन क्रमांकच अवैध ठरला. वरिष्ठ अधिकाऱ्यांच्या हस्तक्षेपानंतर चुकीची नोंद हटविण्यात आली असून, ई-चलन प्रणालीत अधिक अचूक पडताळणीची गरज अधोरेखित झाली.