पणजी: राज्याच्या अमलीपदार्थ विरोधी पथकाने म्हापसा येथे शनिवारी पहाटे टाकलेल्या छाप्यात संशयित साईश खवारे (२९, व्हेर्ला काणका) याला अटक करून त्याच्याकडून ३ किलो ८५४ ग्रॅम वजनाचा गांजा जप्त केला आहे. जप्त केलेल्या या अमलीपदार्थाची आंतरराष्ट्रीय बाजारपेठेत किंमत सुमारे १ लाख ९२ हजार रुपये असल्याचे पोलिसांनी सांगितले.

मिळालेल्या माहितीनुसार, अमलीपदार्थविरोधी पथकाने २८ रोजी पहाटे २.३० ते ५.०० च्या दरम्यान म्हापसा परिसरात ही कारवाई केली. संशयिताने आपल्या स्कूटरमध्ये हा गांजा लपवून ठेवला होता. संशयिताला म्हापसा येथील प्रथमश्रेणी न्यायाधीशांसमोर हजर केले असता, न्यायालयाने त्याला चौकशीसाठी ४ दिवसांची पोलिस कोठडी सुनावली.

पोलिस उपनिरीक्षक गिरीश पाडलोस्कर यांच्या नेतृत्वाखालील पथकाने ही मोहीम राबविली. या प्रकरणाचा अधिक तपास पोलिस करत आहेत.