वास्को: वर्षाच्या पहिल्या चार महिन्यांत राज्यातील एकूण हवाई प्रवासी संख्येत मोठ्या प्रमाणात घट झाल्यामुळे, गोव्याचे दाबोळी विमानतळ एप्रिल २०२६ मधील देशांतर्गत प्रवासी वाहतुकीच्या बाबतीत भारतातील १० सर्वात व्यस्त विमानतळांच्या यादीतून बाहेर पडले असल्याचे माहिती सूत्रांकडून प्राप्त झाली आहे.

भारतीय विमानतळ प्राधिकरणाने प्रसिद्ध केलेल्या आणि ''नेटवर्क थॉट्स'' या विमान वाहतूक प्लॅटफॉर्मने संकलित केलेल्या आकडेवारीनुसार, दाबोळी विमानतळाने मार्च २०२६ मध्ये ५,०८,७८५ देशांतर्गत प्रवाशांची हाताळणी केली होती, ज्यामुळे या विमानतळाने देशातील १० सर्वात व्यस्त विमानतळांमध्ये क्षणभरासाठी स्थान मिळवले होते.

मात्र, एप्रिलमध्ये प्रवासी वाहतूक घटल्याने विमानतळाला आपले मानांकन टिकवता आले नाही, त्यामुळे गुवाहाटी विमानतळाला ५,२४,००२ देशांतर्गत प्रवाशांसह अव्वल १० च्या यादीत प्रवेश मिळाला. बंगळूर, मुंबई आणि दिल्लीसह प्रमुख मेट्रो विमानतळांचे वर्चस्व कायम राहिले.

तीन महिन्यांत ३,२१,०६२ प्रवाशांची किंवा सुमारे २७.२ टक्क्यांची घट झाली. जानेवारी २०२६ मध्ये, गोव्याने ८६,४९१ आंतरराष्ट्रीय आणि सुमारे १०.९५ लाख देशांतर्गत प्रवाशांची नोंद केली होती. एप्रिलपर्यंत, आंतरराष्ट्रीय प्रवासी संख्या मोठ्या प्रमाणात घटून १६,२१६ झाली, तर देशांतर्गत प्रवाशांची संख्या ८.४५ लाखांपर्यंत कमी झाली. आंतरराष्ट्रीय वाहतुकीत सर्वात मोठी घट दिसून आली, जानेवारी ते एप्रिल दरम्यान प्रवासी संख्येत ८१ टक्क्यांहून अधिक घट झाली, ज्याचे मुख्य कारण हिवाळी पर्यटनाचा आणि आंतरराष्ट्रीय चार्टर हंगामाचा शेवट हे मानले जाते.

गोव्यातील विमान वाहतूकही कमी झालेली असून त्याच कालावधीत, एकूण विमान ये-जा जानेवारीतील ७,४२५ वरून एप्रिलमध्ये ५,७०० पर्यंत घटली, तर आंतरराष्ट्रीय विमान ये-जा ४८९ वरून ११० पर्यंत कमी झाली. ही घट होऊनही, दाबोळी विमानतळ आणि मोपा येथील मनोहर आंतरराष्ट्रीय विमानतळ या दोन्ही ठिकाणच्या एकत्रित प्रवासी वाहतुकीचा विचार केल्यास, एप्रिल २०२६ मध्ये गोवा देशातील १० विमान वाहतूक बाजारपेठांमध्ये कायम राहिला

या घडामोडीमुळे गोव्याच्या विमान वाहतूक आणि पर्यटन क्षेत्रात चर्चा सुरू झाली आहे, विशेषतः बदलत्या प्रवासाच्या पद्धती आणि दाबोळी व मोपा विमानतळांमधील वाढत्या स्पर्धेच्या पार्श्वभूमीवर मंत्रालयाच्या आकडेवारीनुसार, जानेवारी २०२६ मध्ये मोपा आणि दाबोळी या दोन्ही विमानतळांवरून एकूण ११ लाख ८२ हजार ३१६ प्रवाशांची नोंद झाली होती.

त्यामध्ये ८६ हजार ४९१ आंतरराष्ट्रीय प्रवासी आणि सुमारे १०.९५ लाख देशांतर्गत प्रवाशांचा समावेश होता. मात्र एप्रिल २०२६ पर्यंत ही संख्या घटून ८ लाख ६१ हजार २५४ वर आली. त्यामध्ये केवळ १६ हजार २१६ आंतरराष्ट्रीय प्रवासी आणि ८.४५ लाख देशांतर्गत प्रवासी होते. अवघ्या तीन महिन्यांत गोव्यातील हवाई प्रवासी संख्येत ३ लाख २१ हजारांहून अधिक प्रवाशांची घट झाल्याचे यावरुन स्पष्ट झाले आहे.

दाबोळी विमानतळावर मार्च २०२६ मध्ये ५,०८,७८५ प्रवासी हाताळण्यात आले. देशातील पहिल्या दहा व्यस्त विमानतळांमध्ये दाबोळीचा क्रमांक लागला. परंतु एप्रिलमध्ये हवाई वाहतूक घटली. गुवाहाटी विमानतळावर एप्रिलमध्ये ५,२४,००२ प्रवासी हाताळण्यात आले.

हवाई वाहतुकीची घसरण

जानेवारी २०२६ : ११.८२ लाख प्रवासी

एप्रिल २०२६ : ८.६१ लाख प्रवासी

घट : ३.२१ लाखांहून अधिक प्रवासी

आंतरराष्ट्रीय प्रवासी घट : ८१% पेक्षा जास्त

विमान ये-जा : ७,४२५ वरून ५,७०० पर्यंत कमी

दाबोळी (मार्च) : ५,०८,७८५ प्रवासी