मडगाव: कोंब मडगाव (Madgaon) येथे एका बंद घरात ठेवलेल्या दोन गॅस सिलिंडरचा स्फोट (Explosion of the gas cylinder) झाल्याने सुमारे 10 लाखांचे नुकसान झाले. घराचे बांधकाम चालू असल्यामुळे घरमालकाने आपले सर्व सामान एका खोलीत बंद करून ठेवले होते. त्याच खोलीत हा स्फोट झाला. जुल्स फेर्नांडिस (Jules Fernandes) यांच्या मालकीचे हे घर असून रात्री 8.30 च्या सुमारास हा स्फोट झाला. त्या बंद खोलीत एकूण पाच सिलिंडर होते त्यातील दोन सिलिंडर फुटले. या खोलीत जे किमती सामान ठेवले होते त्याचीही राख झाली.

या घटनेची वर्दी अग्निशमन दलाला (Fire brigade) दिल्यानंतर त्यांनी लगेच घटनास्थळी धाव घेऊन आग आटोक्यात आणली. या खोलीत असलेले आणखी तीन सिलिंडर त्यांनी बाहेर काढले. फेर्नांडिस यांनी आपले जुने घर मोडून दुसरे नवीन घर बांधण्याचे काम हाती घेतले होते. त्यासाठी घराच्या बाजूला एक खोली बांधून तिथे त्यांनी आपले सर्व सामान ठेवले होते. या खोलीत कुणी राहत नसल्याने कुठलीही जीवित हानी मात्र झाली नाही