पणजी: ऑनलाईन ट्रेडिंगमध्ये गुंतवणूक केल्यास मोठा परतावा देण्याचे आमिष दाखवून मडगावमधील एका महिलेची ३३ लाख ७५ हजार रुपयांची फसवणूक केल्याप्रकरणी गोवा सायबर गुन्हे पोलिसांनी ३३ वर्षीय मोहम्मद रफिज (मूळ बंगळुरू) याला अटक केली आहे.

पोलिसांकडून मिळालेल्या माहितीनुसार, संबंधित महिलेला व्हॉट्स ॲपच्या माध्यमातून ‘सोशल व्हेंचर कॅपिटलिस्ट एआय ट्रेडिंग’ नावाच्या एका बनावट कंपनीचे प्रतिनिधी असल्याचे भासवून संशयितांनी संपर्क साधला होता. गुंतवणुकीवर भरघोस परतावा देण्याचे आमिष दाखवून या महिलेच्या विविध बँक खात्यांमधून ३३ लाख ७५ हजार रुपये उकळले. याप्रकरणी २४ मार्च रोजी सायबर पोलिस स्थानकात गुन्हा दाखल झाला होता. संशयिताला न्यायालयात हजर केले असता, त्याला पोलिस कोठडी सुनावली आहे.

संशयित सराईत गुन्हेगार

सायबर पोलिसांनी तांत्रिक तपास करत या फसवणुकीतील ८ लाख रुपये संशयित मोहम्मद रफिजच्या बँक खात्यात वळते झाल्याचे शोधून काढले. ही धक्कादायक बाब म्हणजे, रफिजचे बँक खाते तामिळनाडू आणि गोव्यातील (Goa) इतर दोन सायबर गुन्ह्यांशीही संबंधित असल्याचे निष्पन्न झाले आहे.