साखळी: साखळीतून एक धक्कादायक बातमी समोर आली आहे. साखळीतील भर बाजारात एका झाडाला गळफास घेऊन तरुणाने जीवन संपवले. विठ्ठलापूर-कारापूरातील हा तरुण असल्याची माहिती आहे. बुधवारी (4 डिसेंबर) पहाटे त्याने हे धक्कादायक पाऊल उचलल्याचे समजते.

दरम्यान, साखळी (Sanquelim) काडा मार्केटसमोरील खुल्या जागेत एका झाडाला विक्रेत्यांकडून ताडपत्री बांधण्यासाठी बांधलेल्या दोरीच्या सहाय्यानेच सदर तरुणाने गळफास घेतला. पोलिसांनी तात्काळ घटनास्थळी पोहोचून मृतदेह खाली उतरवला आणि पंचनामा केला. दुसरीकडे मात्र, तरुणाने एवढे टोकाचे पाऊल का उचलले हे अद्याप स्पष्ट झालेले नाही.

नदीत पडून जीवनयात्रा संपवली

काही दिवसांपूर्वी, विठ्ठलपूर-कारापूर येथून अशीच आत्महत्येची घटना समोर आली होती. नदीत उडी मारुन एका 30 वर्षीय तरुणाने आपली जीवनयात्रा संपवली होती. विठ्ठलापूर येथील व्यंकटेश्वर बसवराज कुयकर या तरुणाने पुलावरुन नदीत उडी मारली होती.