म्हापसा: उत्तर गोव्यातील म्हापसा परिसरातून एक संतापजनक घटना समोर आली आहे. एका ३४ वर्षीय व्यक्तीने १५ वर्षीय अल्पवयीन मुलाचे अपहरण करून त्याच्यावर लैंगिक अत्याचार केल्याचा धक्कादायक प्रकार उघडकीस आला आहे. याप्रकरणी म्हापसा पोलिसांनी तातडीने कारवाई करत संशयित आरोपीला ताब्यात घेतलं असून कोर्टानं त्याला ५ दिवसांची पोलीस कोठडी सुनावण्यात आली आहे.

लिफ्ट देण्याचा बहाणा

मिळालेल्या माहितीनुसार, ही घटना ७ जानेवारी २०२६ रोजी रात्री १० ते ११ च्या सुमारास घडली. पीडित मुलगा म्हापसा येथील रस्त्यावरून पायी चालत जात होता. यावेळी बस्तोडा येथील रहिवासी असलेला मॅथ्यू अल्मेडा (वय ३४) याने आपल्या स्कूटरवरून मुलाचा पाठलाग केला. पालकांच्या संमतीशिवाय आणि मुलाला आमिष दाखवून मॅथ्यूने त्याला आपल्या दुचाकीवर बसवले आणि निर्जन स्थळी नेले.

संशयित आरोपीने मुलाचे वय कमी असल्याचे माहीत असूनही त्याच्याशी अश्लील चाळे केले आणि त्याच्यावर लैंगिक अत्याचार केला. पीडित मुलाने या प्रकाराचा प्रतिकार करण्याचा प्रयत्न केला, मात्र आरोपीने त्याला धमकावले. या घटनेनंतर घाबरलेल्या मुलाने घरी जाऊन आपल्या पालकांना सर्व घडलेली घटना सांगितली. पालकांनी वेळ न घालवता म्हापसा पोलीस ठाण्यात धाव घेऊन तक्रार नोंदवली.

पोक्सो (POCSO) कायद्यांतर्गत गुन्हा दाखल

म्हापसा पोलिसांनी तक्रारीचे गांभीर्य ओळखून तातडीनं तपास चक्रावली आणि आरोपी मॅथ्यू अल्मेडा याला ताब्यात घेतलं. पोलिसांनी त्याच्याविरुद्ध भारतीय दंड संहितेच्या संबंधित कलमांसह बाल लैंगिक अत्याचार प्रतिबंधक कायद्याच्या (POCSO Act) कडक कलमांखाली गुन्हा दाखल केला आहे. 

अल्पवयीन मुलांच्या सुरक्षिततेचा प्रश्न या घटनेमुळे पुन्हा एकदा ऐरणीवर आला आहे. पोलीस सध्या या प्रकरणाचा सखोल तपास करत असून आरोपीला न्यायालयात हजर केलं असता त्याला ५ दिवसांची पोलीस कोठडी सुनावण्यात आलीय.