पणजी: गोवा वैद्यकीय महाविद्यालयाच्या बाहेर एका बंद दुकानासमोर मृतदेह आढळल्याने रविवार (दि.१३) रोजी बांबोळी परिसरात खळबळ निर्माण झाली. मृत व्यक्तीच्या डोक्यावर जखमा असल्याने हा मृत्यू नेमका खून आहे की नेमकं प्रकरण काय हे शवचिकित्सेनंतर स्पष्ट होईल अशी माहिती पोलिसांनी दिलीये. सध्या आगशी पोलिसांनी या प्रकरणाबद्दल गुन्हा नोंद केला असून पुढील तपास सुरु आहे.

रविवार (दि.१३) रोजी दुपारी बांबोळी येथील गोवा वैद्यकीय महाविद्यालयाजवळ असलेल्या एका बंद दुकानासमोर एक अज्ञात मृतदेह आढळला. मृत व्यक्तीचे नाव संतोष कांबळे (५०, बेळगाव) असे असून त्याच्या मृत्यूचा उलघडा अजून झालेला नाही.

पोलिसांना मृत व्यक्तीच्या डोक्यावर काही जखमा आढळून आल्यात आणि त्याच्या शेजारी एक दारूची बाटली देखील आढळली आहे.

उत्तर गोव्याचे पोलीस अधीक्षक अक्षत कौशल हे देखील घटनास्थळी दाखल झाले, त्यानंतर श्वानपथकाच्या साहाय्याने घटनास्थळाची पाहणी करण्यात आली .

पोलीस तपासातून समोर आलेल्या माहितीनुसार संतोष कांबळी हा मूळ बेळगावचा रहिवासी होता, जो गेल्या काही दिवसांपासून पणजी येथील सांताक्रुझ परिसरात पत्नीसोबत राहायचा. पत्नीसोबत दारूच्या नशेत झालेल्या वादानंतर तो दुकानाच्या बाहेर झोपायचा.

गोवा पोलिसांना घटनास्थळी काही रक्ताने माखलेले दगड आणि आजूबाजूला रक्ताचे डाग आढळले आहेत. पंचनामा झाल्यानंतर सध्या हा मृतदेह बांबोळीतील शवघरात ठेवण्यात आलाय तर शवचिकित्सेनंतर मृत्यूचे कारण स्पष्ट होईल असं पोलीस म्हणाले आहेत. उपनिरीक्षक दीपिका परवार या एकूण प्रकरणाचा तपास करत आहेत.