धारबांदोड्यातील कुळे गावातून एक धक्कादायक घटना समोर आली आहे. येथील एका माध्यमिक विद्यालयात दहावीत शिकणाऱ्या मुलाने गळफास घेवून जीवन संपवले. रविवारी (12 जानेवारी) रात्री वडील रागावल्याने रागाच्या भरात पीडिताने टोकाचे पाऊल उचलल्याचे सांगितले जात आहे. पोलिसांना या धक्कादायक घटनेची माहिती मिळताच त्यांनी तात्काळ घटनास्थळी धाव घेतली. पोलिसांनी पंचनामा करुन पीडिताचा मृतदेह पोस्टमार्टमसाठी पाठवला आहे.

नेमकं प्रकरण काय?

दरम्यान, गेल्या काही दिवसांपासून दहावीत शिकणाऱ्या या मुलाने आपल्या वडीलांकडे मोबाईलचा हट्ट धरला होता. त्याचवेळी, रविवारी (12 जानेवारी) रात्री वडील त्याला रागावले. त्याच रागातून पीडिताने राहत असलेल्या भाड्याच्या खोलीतच गळफास घेवून जीवन संपवले. सदर पीडिताचे कुटुंब मूळचे बिहारचे (Bihar) असून गेल्या अनेक वर्षांपासून ते कुळे येथे राहत आहे.

मारहाणीची घटना

धारबांदोड्यातूनच हायस्कूलच्या शिपायाने ग्राऊंडवर खेळणाऱ्या मुलांना मारहाण केल्याची घटना रविवारी (12 जानेवारी) समोर आली होती. या मारहाणीत 4 मुले जखमी झाली होती. प्रेमानंद शंकर गावडे या शिपायाने मुलांना मारहाण केली. जखमींना तात्काळ जवळच्या रुग्णालयात (Hospital) दाखल करण्यात आले. उपचारानंतर डॉक्टरांनी लगेच मुलांना डिस्चार्च देखील दिला. दरम्यान, या घटनेबाबत पोलिसांना कळवण्यात आले. पोलिसांनी सदर आरोपी शिपायास तात्काळ ताब्यात घेतले.