मांद्रे: गोव्यातील मांद्रे परिसरात एक भयंकर प्रसंग घडला आहे. मांद्रे येथील रहिवासी शांबा नाईक आणि त्यांची पत्नी अन्नपूर्णा नाईक यांना मारहाण करण्यात आलीये. माध्यमांना शांबा नाईक यांनी दिलेल्या माहितीनुसार ७ मार्च रोजी मांद्रे पंचायतीत बेकायदेशीर जमिनीच्या प्रकरणावर सुनावणी होणार असल्याने ते पंचायतीत निघाले असताना काही स्थानिकांकडून त्यांच्यावर हल्ला चढवण्यात आला. यावेळी त्यांच्या मदतीला धावून आलेल्या त्यांच्या पत्नीला देखील मारहाण करण्यात आली. पोलिसांनी देखील या प्रसंगाची तक्रार नोंदवण्यात उशीर केल्याचं त्यांनी सांगितलंय.

रॉड आणि धारधार हत्याराने वार

पीडित शांबा नाईक यांनी दिलेल्या माहितीनुसार पंचायतीत गेल्यानंतर त्यांना एका पेपरवर सही करायला सांगितलं आणि यानंतर तिथेच उपस्थित असलेल्या जगन्नाथ नाईक, रजत नाईक, प्रशांत नाईक यांनी त्यांना मारायला सुरुवात केली. त्यांच्यावर मागून रॉडने वार करण्यात आला तसेच धारधार हत्याराने सुद्धा बरेच वार झाले.

पतीला सोडवण्यासाठी आलेल्या अन्नपूर्णा नाईक यांना देखील मारहाण करण्यात आली. त्यांच्या डोक्यावर मागून दोनवेळा रॉडने वार केल्याचं त्या सांगतात. हा संपूर्ण प्रकार घडत असताना पंचायतीच्या माणसांकडून कुठलीही हालचाल झाली नाही याबद्दल त्यांनी खेद व्यक्त केला तसेच हे प्रकरण पुर्नविनियोजीत तर नाही ना? असा प्रश्न उपस्थित केला आहे. या प्रकरणानंतर त्यांना बांबोळीमध्ये उपचारांसाठी पाठवण्यात आले आणि त्यानंतर पोलिसांकडे तक्रार केली गेली अशी माहिती या जोडप्याने दिलीये.

यापूर्वी दिली होती मारण्याची धमकी!

अन्नपूर्णा नाईक यांनी सांगितल्यानुसार, काही दिवसांपूर्वी त्यांना रजत नाईक नावाच्या इसमाकडून जीवे मारण्याची धमकी देण्यात आली होती. एका संध्याकाळी गिरणी बंद करून घरी परतत असताना रजत नाईक याने त्यांना धमकावलं होतं आणि रक्तपात करवण्याची धमकी दिली होती. जोडप्याने दिलेल्या माहितीनुसार रजत नाईककडून यापूर्वी देखील त्यांना बराच त्रास देण्यात आलाय. त्यांच्या घराजवळ सीसीटीव्ही कॅमेरे फोडणं, गाड्या फोडण्यासोबतच मारण्याच्या धमक्या देण्यात आल्या होत्या मात्र पोलिसांनी तो अल्पवयीन आहे असं म्हणत कोणतीही तक्रार दाखल केली नव्हती.