Goa Crime इंस्टाग्रामवरील ओळखीचे रूपांतर मैत्रीत करून मुख्य संशयिताने सोळा वर्षीय अल्पवयीन मुलीस फूस लावून आपल्या इतर मित्रांसोबत तिचे कथित अपहरण केले. या प्रकरणी म्हापसा पोलिसांनी तीन युवकांना अटक केली. या अपहरण प्रकरणाचा छडा म्हापसा पोलिसांनी सहा तासांत लावत पीडित मुलीची संशयितांच्या तावडीतून सुखरूप सुटका केली.

याप्रकरणी पोलिसांनी नरेंद्र ऊर्फ बादल सिंग (चिखली, कोलवाळ), आरॉन पर्सी मोनिज (अस्नोडा), आयुष मांद्रेकर (सिरसई) या तिघांना अटक केली. पीडित मुलीची संशयित नरेंद्र याच्याशी इंस्टाग्रामवर ओळख झाली.

या ओळखीचे रूपांतर मैत्रीत झाल्यानंतर संशयित नरेंद्र याने तिला आपल्यासोबत येण्याचे आमिष दाखविले. त्यानुसार, संशयिताने आपले मित्र आयुष व आरॉनशी संपर्क साधून पीडितेला अस्नोडा येथील आरॉनच्या घरी नेऊन ठेवले.

पीडितेच्या वडिलांनी आपली मुलगी बेपत्ता असल्याची तक्रार दिल्यानंतर तिचा शोध घेण्यासाठी पोलिस उपअधीक्षक जीवबा दळवी व पोलिस निरीक्षक सीताकांत नायक यांच्या नेतृत्वाखाली दोन पथके तयार करण्यात आली.

ज्यामध्ये उपनिरीक्षक गौरव नाईक, उपनिरीक्षक दिनेश कुमार मुखिया, उपनिरीक्षक विराज कोरगावकर, महिला उपनिरीक्षक रिचा भोसले, हेडकॉन्स्टेबल सुशांत चोपडेकर, कॉन्स्टेबल प्रकाश पोळेकर, राजेश कांदोळकर, अक्षय पाटील, महिला पोलिस कॉन्स्टेबल रंजना परब यांनी फिर्यादीच्या घरापासून जवळील परिसरातील सीसीटीव्ही फुटेज तपासून तांत्रिक सर्व्हेलियन्सच्या आधारे पीडितेचा यशस्वीरीत्या शोध घेतला.

तपासाला तंत्रज्ञानाची जोड

• पीडितेच्या वडिलांनी आपली मुलगी बेपत्ता झाल्याची तक्रार देताच, पोलिसांनी लगेच हालचाली सुरू केल्या. तसेच तांत्रिक व मानवी सर्व्हेलियन्सच्या आधारे पीडिता ही अस्नोडामध्ये असल्याचे समजले. त्यानुसार, पोलिसांनी अस्नोडामधून मुलीची सुटका केली.

• पोलिसांनी संशयितांविरुद्ध भारतीय दंड संहितेच्या कलम ३६३ व गोवा बाल कायद्याच्या कलम ८ अन्वये गुन्हा नोंदवून तिघांना अटक केली. या संशयितांना म्हापसा न्यायालयाने ३ दिवसांची पोलिस कोठडी सुनावली. तर, पीडितेची रवानगी मेरशीमधील अपना घरात केली.