Goa Crime Case: खोर्जुवे, हळदोणा येथील एका 23 वर्षीय युवकावर तिघा अनोळखी व्यक्तींकडून प्राणघातक सुरी हल्ला झाला. यात युवक गंभीर जखमी झाल्याने त्याला गोमेकॉत दाखल करण्यात आले. त्याच्यावर उपचार सुरू आहेत.

प्रणव फडते असे जखमीचे नाव असून, म्हापसा पोलिसांनी तीन अज्ञात व्यक्तींविरोधात गुन्हा दाखल केला. पूर्ववैमनस्यातून हा हल्ला झाल्याचे बोलले जात आहे.

माहितीनुसार, ही घटना गुरुवारी (ता.15) रात्री 11.30 च्या सुमारास गोळजुवे, खोर्जुवे येथे घडली. यावेळी तीन अनोळखी संशयित हे कार गाडीमधून आले असता, यातीन एकाने प्रणव फडते याच्यावर अचानक सुरी हल्ला चढविला.

यावेळी सुरीचा वार अडविण्यासाठी प्रणव याने आपले हात पुढे केले असता, त्याच्या दोन्ही हातांना घाव लागून तो रक्तबंबाळ झाला. त्यानंतर, संशयित घटनास्थळावरुन पसार झाले.

संशयितांची ओळख पटली असून, म्हापसा पोलिस या त्यांच्या मागावर आहेत. यापैकी मुख्य संशयित हा डोंगरी परिसरातील असल्याचे समजते.

गोव्यातील वाढत्या गुन्हेगारी हे एक ज्वलंत उदाहरण असून दिवसेंदिवस राज्यातील कायदा सुव्यवस्थेचा प्रश्न ऐरणीवर आल्याचे बोलले जातेय.

दोन दिवसांपूर्वी उसगाव येथे एका तरुणीवर प्रेमप्रकरणातून हल्ला करत तिला जखमी केल्याचे समोर आले होते. सदर तरुणीच्या डोक्यात बियरची बाटली मारत तिला गंभीररित्या जखमी केले होते.