Raid on gambling dens in Cansaulim : कोणत्याही परिस्थितीत गुन्हेगारी आणि जुगार- मटका खपवून घेतला जाणार नाही असे मुख्यमंत्री डॉ. प्रमोद सावंत यांनी जाहीर केल्यानंतर पोलिसांनी मटका व जुगारी अड्ड्यावर कारवाई करण्याचे सत्र चालू केले आहे.

मुरगाव येथील कासावलीत गुन्हा शाखेने जुगार अड्ड्यावर छापा टाकला आहे. ही कारवाई आज करण्यात आली. या कारवाईत एकूण 15 संशयितांना अटक करण्यात आली असून रोख रक्कम व जुगाराचे साहित्य जप्त करण्यात आले आहे.

याबाबत अधिक माहिती अशी की, मुरगाव येथील कासावली येथे जुगार अड्डा सुरु असल्याची माहिती मिळाली होती. या माहितीच्या आधारे गुन्हा शाखेच्या पोलिसांनी कासावलीतील जुगार अड्ड्यावर छापा टाकला.

या छाप्यात एकूण 15 संशयितांना अटक करण्यात आली आहे. संशयितांकडून एकूण 2 लाख 73 हजार रुपयांची रोख रक्कम व जुगार साहित्य जप्त करण्यात आले आहे. पोलिस पुढील तपास करीत आहेत.

कोणत्याही परिस्थितीत गुन्हेगारी आणि जुगार- मटका खपवून घेतला जाणार नाही असे मुख्यमंत्री डॉ. प्रमोद सावंत यांनी ''हॅलो गोयंकार'' या कार्यक्रमात सांगितले होते.

"राज्यात मटका, जुगार किंवा कोणत्याही गुन्हेगारी बाबींना थारा दिला जाणार नाही. यासाठी पोलिसांना आवश्यक असलेल्या सूचना देण्यात आल्या असून प्रामुख्याने झोपडपट्ट्यांमध्ये गुन्हेगारी मोडून काढण्यासाठी आमच्या सरकारचे प्राधान्य असेल."

लोकांनी आपल्या तक्रारी समस्या लिहून उपजिल्हाधिकारी कार्यालयात तक्रार पेटीत टाकाव्यात. या तक्रारींची मुख्यमंत्री कार्यालयाकडून दखल घेण्यात येईल असे मुख्यमंत्र्यांनी जाहीर केले.