Goa Congress फोंडा गट काँग्रेस समितीची बैठक येथील कार्यालयात गट समितीचे अध्यक्ष विलियम आगियार यांच्या अध्यक्षतेखाली घेण्यात आली. यावेळी फोंड्याचे काँग्रेस नेते राजेश वेरेकर उपस्थित होते. पालिका निवडणुकीतील कार्याचा आढावा या बैठकीत घेण्यात आला.

फोंडा मतदारसंघात बूथ समित्या नियुक्त करून काँग्रेसच्या कार्याला परत एकदा चालना देण्याचा निर्णय यावेळी घेण्यात आला. लोकसभा निवडणुकीची तयारी करण्याचाही निर्णय घेण्यात आला.

फोंडा मतदारसंघातून दक्षिण गोव्यातील काँग्रेस उमेदवाराला जास्तीत जास्त आघाडी मिळवून देण्याकरता कार्यकर्त्यांनी प्रयत्न करावेत, असे आव्हान वेरेकर यांनी केले.

यावेळी अरुण गुडेकर, मिंगेल फर्नांडिस, प्रशिल शेट पारकर, डायगो डिसोझा, नारायण नाईक, सायमन आगियार, फ्रान्सिस फर्नांडिस आदींनी विविध सूचना केल्या. सुरवातीला गटाध्यक्ष आगियार यांनी स्वागत केले, शेर्ली डायस यांनी सूत्रसंचालन केले, तर सलीम बडेसाब यांनी आभार मानले.

काँग्रेसला पूरक वातावरण : वेरेकर

बेरोजगारी, महागाई यामुळे त्रस्त झालेले नागरिक भाजप राजवटीला कंटाळले असून काँग्रेसला पूरक वातावरण निर्माण झाले असल्याचे काँग्रेस नेते राजेश वेरेकर यांनी सांगितले.

फोंडा हा काँग्रेसचा बालेकिल्ला म्हणून गणला जात होता आणि आता परत एकदा ही बाब सिद्ध करण्याची वेळ आली आहे. कार्यकर्त्यांनी या संधीचा फायदा घ्यावा, असे आव्हान त्यांनी केले.