Girish Chodankar: दक्षिण गोवा लोकसभा निवडणुकीसाठी काँग्रेसचा उमेदवार म्हणून मी अर्ज केला आहे. परंतु, तेथे अल्पसंख्याक उमेदवाराचे नाव विचारात असेल तर आपली त्यासाठी काहीही अडकाठी असणार नाही, असे स्पष्टीकरण काँग्रेसचे माजी प्रदेशाध्यक्ष गिरीश चोडणकर यांनी केले.

लोकसभा निवडणुकीच्या अनुषंगाने काँग्रेस उमेदवारीविषयी चोडणकर यांनी आपली भूमिका मांडली. काँग्रेस भवनात पत्रकार परिषदेत ते बोलत होते.

चोडणकर म्हणाले, गत निवडणुकीत पक्षाने आपणास लढण्याची सूचना केली, त्यामुळे आपण मैदानात उतरलो आहे. तत्पूर्वी 2017 मध्ये पोटनिवडणूक लागल्याने मनोहर पर्रीकर यांच्याविरोधात काँग्रेसने दोन उमेदवार तयार ठेवले होते, परंतु त्यावेळी ऐनवेळी आपल्याला उमेदवारी स्वीकारून रिंगणात उतरवावे लागले.

उत्तर गोव्यातून काही नावे:-

उत्तर गोव्यात पक्षाकडे ॲड. रमाकांत खलप, विजय भिके, राजन घाटे आणि संजय बर्डे यांच्यासारखे उमेदवार आहेत, त्यांची नावे यादीत आहेत आणि हे चांगले उमेदवार आहेत. आपण उत्तर गोवा लोकसभेच्या उमेदवारीचा विचार केलेला नाही.

दक्षिणेतून आपण उमेदवारी मिळावी म्हणून अर्ज दिला आहे. मात्र, दक्षिण गोवा लोकसभा मतदारसंघ अल्पसंख्यांक उमेदवाराच्या मागे राहणारा आहे, त्यामुळे त्याठिकाणी अल्पसंख्यांक उमेदवार देण्याचा विचार झाल्यास आपली काहीही हरकत राहणार नाही.