Panjim: सांताक्रुझ मतदारसंघाचा विकास होण्यासाठी माजी आमदार व्हिक्टोरिया फर्नांडिस ऊर्फ मामी यांनी खूप प्रयत्न केले. त्यांनी रस्त्यावर आंदोलनेही केली मात्र काँग्रेसने त्यांच्यावर नेहमीच अन्याय करत आले. त्यांचे पुत्र आमदार रुदॉल्फ फर्नांडिस यांनी याच कारणासाठी भाजपमध्ये प्रवेश केला आहे.

या मतदारसंघाचा विकास व्हावा हे त्यांचे अधुरे राहिले स्वप्न त्यांचे पुत्र पूर्ण करतील व त्यासाठी सरकार सर्व ती मदत करील, असे आश्‍वासन काल मुख्यमंत्री डॉ. प्रमोद सावंत यांनी दिले.

सांताक्रुझ येथील हायस्कूलमध्ये सांताक्रुझ समाजकल्याण संघटनेतर्फे महात्मा गांधी जयंतीनिमित्त कार्यक्रमाचे आयोजन करण्यात आले होत्या त्यामध्ये डॉ. सावंत हे प्रमुख पाहुणे म्हणून बोलत होते.

व्यासपीठावर आमदार रुदॉल्फ फर्नांडिस व भाजप नेते केशव प्रभू उपस्थित होते. विद्यार्थ्यांसाठी चित्रकला स्पर्धा आयोजित करण्यात आली होती. त्यातील विजेत्यांना मुख्यमंत्र्यांच्या हस्ते विद्यार्थ्यांना बक्षिसे देऊन गौरवण्यात आले.

डॉ. सावंत म्हणाले, मामी फर्नांडिस यांनी काही प्रकल्पांची पायाभरणी केली.पण त्यानंतर हे प्रकल्प पूर्णच झाले नाहीत. त्या नेहमीच मतदारसंघाचा व गोव्याचा विकास यासाठी नेहमीच झटत राहिल्या.

मोफत जेवण उपलब्ध: संघटनेतर्फे उपस्थित मुलांना व त्यांच्या पालकांना मोफत जेवण उपलब्ध करण्यात आले होते. मुख्यमंत्री डॉ. प्रमोद सावंत व आमदार रुदॉल्फ फर्नांडिस यांच्या हस्ते मुलांना व पालकांना भोजन वाढण्यात आले. आमदार रुदॉल्फ फर्नांडिस हे भाजपवासी झाल्यानंतरचा या मतदारसंघातील पहिलाच कार्यक्रम असल्याने या मतदारसंघातील लोकांची उपस्थिती होती.