गोवा विधानसभेचे पावसाळी अधिवेशन १५ जुलैपासून सुरु झाले असून, विरोधक विविध मुद्यावरुन सत्ताधाऱ्यांना घेरताना दिसत आहेत. चर्चे दरम्यान बऱ्याचवेळा सत्ताधारी तसेच विरोधक एकमेकांवर आरोपप्रत्यारोप करण्यासह कधी कोपरखळी तर कधी खोचक टीका करतायेत.

विरोधी बाकावरील नेत्यांना पाच पांडव म्हणून टीका करताना मुख्यमंत्री डॉ. प्रमोद सावंत चुकले आणि त्यांची चूक काँग्रेस आमदारांनी दुरुस्त केली.

झाले असे की, अधिवेशनाच्या चौथ्या दिवसाच्या चर्चेदरम्यान, मुख्यमंत्री डॉ. प्रमोद सावंत यांनी विरोधी बाकावरील आमदारांवर पाच पांडव म्हणत टीका केली. यावेळी त्यांनी सभागृहात शत्रुघ्न देखील पांडव असल्याचे म्हटले.

ही चूक केपेचे काँग्रेस आमदार एल्टन डिकॉस्ता यांच्या लक्षात येताच त्यांनी मुख्यमंत्री आणि सभागृहाच्या ते निदर्शनास आणून दिले.

एल्टन डिकॉस्तांनी सभागृहात पाच पांडवांची नावे युधिष्ठिर, भीम, अर्जुन, नकुल आणि सहदेव असल्याचे सांगितले. यावेळी विरोधी पक्षनेते आलेमाव यांनी देखील यात डिकॉस्तांच्या मदतीला येते मुख्यमंत्र्यांची चूक दुरुस्त करावी अशी मागणी केली.

सभागृहातील या चर्चेचा व्हिडिओ सध्या समाजमाध्यमांवर चांगलाच व्हायरल होत आहे. यात आमदार एल्टन डिकॉस्ता, विरोधी पक्षनेते युरी आलेमाव आणि मुख्यमंत्री डॉ. प्रमोद सावंत यांच्यातील सभागृहातील संवाद दिसत आहे.

डिकॉस्ता आणि आलेमाव याप्रकरणी प्रतिक्रिया देताना मुख्यमंत्र्यांनी विरोधकांना पांडव म्हणून संबोधल्याबद्दल आभार मानलेत.

'मुख्यमंत्री डॉ. प्रमोद सावंत यांनी सभागृहात शत्रुघ्न पांडव असल्याचे म्हटले. परंतू, ते महाभारतात नव्हे तर रामायणातील प्रभू रामाचे भाऊ होत. आम्हाला पांडव म्हणून संबोधल्याबद्दल आम्ही मुख्यमंत्र्यांचे आभार मानतो,' डिकॉस्ता आणि आलेमाव म्हणाले.