पणजी: विरोधी आमदारांचा विरोध झुगारत सरकारने बुधवारी ‘गोवा दावे मूल्‍यांकन विधेयक : २०२५’ व ‘गोवा पशुसंवर्धन आणि पाळीव प्राणी (नियमन आणि भरपाई) विधेयक : २०२५’ सभागृहात मंजूर करून घेतले. या दोन्‍ही विधेयकांतील त्रुटी दाखवत विरोधकांनी सरकारला कात्रीत पकडण्‍याचे पूर्ण प्रयत्‍न केले. परंतु सरकारने माघार न घेता ही विधेयके मंजूर करून घेतली.

सदर विधेयकांना काही महिन्‍यांपूर्वी राज्‍य मंत्रिमंडळाने मान्‍यता दिली होती. त्‍यानंतर आज बुधवारी ती सभागृहात आली. ‘गोवा दावे मूल्‍यांकन विधेयक २०२५’ सादर झाल्‍यानंतर विरोधी पक्षनेते युरी आलेमाव, आमदार ॲड. कार्लुस फेरेरा, आलेक्‍स रेजिनाल्‍ड आदींनी त्‍यातील त्रुटी सरकारसमोर मांडल्‍या. फेरेरा यांनी काही सूचनाही केल्‍या. त्‍यावर विरोधकांच्‍या सूचनांचा गांभीर्याने विचार केला जाईल, अशी ग्‍वाही देत मुख्‍यमंत्र्यांनी हे विधेयक मंजूर करून घेतले.

‘गोवा दावे मूल्यांकन विधेयक’ हे ‘गोवा कोर्ट फी कायदा, २०२४’ च्या तरतुदींशी सुसंगत आहे. गोव्यात दाव्यांचे मूल्यांकन करण्यासाठी एक नवीन चौकट प्रदान करण्याच्‍या उद्देशाने तयार करण्‍यात आले आहे.

लोकांच्‍या सुरक्षिततेला प्राधान्‍य देऊन विधेयक

‘गोवा पशुसंवर्धन आणि पाळीव प्राणी (नियमन आणि भरपाई) विधेयक, २०२५’ विधानसभेत संमत झाल्‍याने रॉटविलर आणि पिटबूल या हिंस्र जातीच्‍या दोन कुत्र्यांवरील बंदीचा मार्ग मोकळा झाला आहे.

या जातीच्‍या कुत्र्यांनी गेल्‍या काही वर्षांत नागरिक आणि मुलांवर हल्ला चढवला. त्‍यात अनेकजण जखमी झाले. त्‍यामुळे जनतेचा विचार करूनच हे विधेयक आणल्‍याचे मुख्‍यमंत्री सावंत यांनी यावेळी बोलताना सांगितले.