Chimbel Panchayat इंदिरानगर - चिंबल येथील बसथांब्याच्या ठिकाणी असलेले बेकायदेशीर गाडे पोलिस बंदोबस्तात आज हटवण्यात आले. सुमारे 28 गाडेधारकांना चिंबल पंचायतीने हे गाडे हटवण्याची नोटीस बजावून 30 मे 23 पर्यंत मुदत दिली होती.

मात्र, त्यांनी ते न हटविल्याने पंचायतीने पोकलेनच्या आज मदतीने हटवले. या कारवाईमुळे त्या ठिकाणी वाहतुकीची होणारी कोंडी दूर झाली आहे. चिंबलच्या काही ग्रामस्थांनी हे गाडे हटवण्यासाठी तक्रार दाखल केली होती.

चिंबल येथील कोमुनिदादच्या जमिनीत गेल्या काही वर्षापूर्वी बेकायदेशीर गाडे उभारण्यात आले होते. हे गाडे तेथील वाहतुकीला अडथळे निर्माण होत होते. वाहनांना जाण्यासाठी येण्यासाठी तेथील अरुंद रस्ता ही डोकेदुखी बनली होती.

दुपारच्यावेळी शालेय विद्यार्थ्यांना या रस्त्यावरून चालताना अडथळा येत होता. वेळोवेळी चिंबल ग्रामस्थांनी ग्रामसभेत त्याविरुद्ध आवाज उठविला होता. मात्र, कारवाईकडे दुर्लक्ष केले जात होते. ग्रामस्थांनी त्यांची मागणी लावून धरल्याने अखेर पंचायतीने हे सर्व गाडे आज हटवण्यात आले.

गाडेधारकांचा विरोध बंदोबस्तामुळे थंड

पंचायतीचे कर्मचारी पोलिस बंदोबस्तात इंदिरानगर चिंबल येथील बसथांब्‍याच्या ठिकाणी पोकलेन घेऊन सकाळी 9 वाजता हजर झाले. यावेळी काही गाडेधारकांनी या कारवाईस मज्जाव केला मात्र, उपस्थित असलेल्या पोलिसांपुढे त्यांचे काही चालले नाही.

काहींनी हे गाडे वाहनात घालून घेऊन गेले. ज्यांनी हे गाडे हटवले नाहीत, ते पोकलेनच्या सहाय्याने हटवण्यात आले व हे सामान पंचायतीने जप्त केले. या कारवाईनंतर तेथील परिसर मोकळा झाल्याने ग्रामस्थांनी समाधान व्यक्त केले.